عالمی بازار میں خام تیل کی ’انڈین باسکٹ‘ کی قیمت کم ہو کر 89.29 ڈالر فی بیرل پر آ گئی ہے۔ حالیہ دنوں میں یہ قیمت 90 ڈالر سے زیادہ تھی، جبکہ اکتوبر میں اس کی اوسط قیمت 120 ڈالر فی بیرل ریکارڈ کی گئی تھی۔ خام تیل کی قیمتوں میں اس کمی کو ہندوستانی معیشت کے لیے بڑی راحت قرار دیا جا رہا ہے، خاص طور پر مالی سال 2027 کی دوسری ششماہی، یعنی اکتوبر سے مارچ کے دوران۔ ماہرین کے مطابق اس سے مہنگائی کے دباؤ میں کمی، کرنٹ اکاؤنٹ خسارے میں کمی اور سرکاری خزانے پر مالی بوجھ کم ہونے کی امید ہے۔
اکتوبر میں خام تیل کی اوسط قیمت مارچ 2012 کے بعد بلند ترین سطح پر پہنچ گئی تھی۔ اس وقت انڈین باسکٹ کی قیمت 123.61 ڈالر فی بیرل ریکارڈ کی گئی تھی۔ توانائی کی لاگت میں اضافے کا اثر مہنگائی پر بھی پڑا اور ستمبر میں تھوک مہنگائی کی شرح بڑھ کر 11.4 فیصد تک پہنچ گئی تھی۔
’ای وائی انڈیا‘ کے چیف پالیسی ایڈوائزر ڈی کے شریواستو نے اخبار ’بزنس اسٹینڈرڈ‘ سے گفتگو کرتے ہوئے کہا کہ خام تیل کی قیمتوں میں موجودہ کمی معاشی ترقی اور مہنگائی، دونوں کے لیے مثبت ثابت ہو سکتی ہے۔ تاہم ان کے مطابق اس کا سب سے زیادہ فائدہ مہنگائی میں کمی کی صورت میں نظر آئے گا، کیونکہ خام تیل کی قیمتیں بلند ہونے کے باوجود معاشی ترقی پر اس کا اثر نسبتاً کم پڑا تھا، جبکہ قیمتوں میں تیزی سے اضافہ ہوا تھا۔
وزارت خزانہ کی اکتوبر کی ماہانہ اقتصادی جائزہ رپورٹ میں بھی کہا گیا ہے کہ پالیسی سازوں کی توجہ مالی سال 2027 کی دوسری ششماہی کو معاشی طور پر محفوظ بنانے پر ہے۔ اس کی وجہ خام تیل کی سابقہ بلند قیمتوں کے ساتھ غذائی مہنگائی اور خریف کی فصل سے متعلق غیر یقینی صورت حال ہے۔
بین الاقوامی اندازوں کے مطابق آئندہ سال خام تیل کی قیمتوں میں مزید کمی آ سکتی ہے۔ اس کی اہم وجوہات میں جغرافیائی سیاسی کشیدگی میں کمی اور مغربی ایشیا سے تیل کی سپلائی بہتر ہونے کی توقع شامل ہے۔ امریکی انرجی انفارمیشن ایڈمنسٹریشن نے 10 نومبر کو جاری اپنے تخمینے میں کہا ہے کہ 2027 کی چوتھی سہ ماہی میں برینٹ خام تیل کی اوسط قیمت 77 ڈالر فی بیرل رہ سکتی ہے۔
ریزرو بینک آف انڈیا کی اپریل 2026 کی مانیٹری پالیسی رپورٹ کے مطابق اگر خام تیل کی قیمت بنیادی سطح 85 ڈالر فی بیرل سے 10 فیصد کم ہوتی ہے تو مہنگائی کی شرح میں تقریباً 50 بیسس پوائنٹس کی کمی آ سکتی ہے، جبکہ حقیقی جی ڈی پی کی شرح نمو میں 15 بیسس پوائنٹس کا اضافہ ممکن ہے۔ تاہم اس کا فائدہ اسی صورت میں مل سکے گا جب عالمی بازار میں خام تیل کی قیمتوں میں کمی کا اثر ہندوستانی صارفین اور گھریلو بازار تک بھی پہنچے۔
