مرکزی حکومت نے اسلامی مبلغ ڈاکٹر ذاکر عبدالکریم نائک کی قیادت میں قائم کی گئی تنظیم ’اسلامک ریسرچ فاؤنڈیشن‘، یعنی آئی آر ایف، پر عائد پابندی میں مزید 5 سال کی توسیع کردی ہے۔ وزارت داخلہ کے مطابق یہ فیصلہ غیر قانونی سرگرمیاں (روک تھام) ایکٹ 1967، جسے یو اے پی اے کہا جاتا ہے، کی دفعہ 3 کے تحت کیا گیا۔ اس ضمن میں نوٹیفکیشن 13 نومبر 2026 کو جاری ہوا، جب کہ تنظیم پر موجودہ پابندی کی مدت 14 نومبر 2026 کو ختم ہونی تھی۔ اس طرح حکومت نے پابندی کی معیاد میں تسلسل برقرار رکھتے ہوئے اگلے 5 سال کے لیے اسے نافذ رکھنے کا اعلان کیا۔
بھارتی وزارت داخلہ کے گزٹ میں شائع نوٹیفکیشن میں کہا کہ آئی آر ایف کی سرگرمیاں ملک کی سلامتی، امن عامہ، فرقہ وارانہ ہم آہنگی اوربھارت کے سیکولر ڈھانچے کے لیے نقصان دہ سمجھی گئی ہیں۔ حکومت کا کہنا ہے کہ تنظیم اور اس کے عہدیداران، خصوصاً بانی اور صدر ڈاکٹر ذاکر نائک، اپنے پیروکاروں کو مذہب کی بنیاد پر مختلف مذہبی طبقات کے دوران عداوت، نفرت اور بدگمانی پھیلانے پر اکساتے ہیں۔
سرکاری مؤقف کے مطابق ڈاکٹر ذاکر نائک کی تقاریر اور بیانات قابلِ اعتراض اور اشتعال انگیز قرار پائے، جن کے باعث مختلف مذہبی گروہوں میں نفرت اور عداوت کو فروغ ملنے کا خدشہ ظاہر کیا گیا۔ مزید یہ الزام بھی درج ہے کہ ان تقاریر سے ہندوستان اور بیرونِ ملک ایک مخصوص مذہب کے کچھ نوجوان دہشت گردانہ سرگرمیوں کی طرف مائل ہوسکتے ہیں۔
حکومت نے اس فیصلے کی تاریخی پس منظر کے طور پر بتایا کہ 17 نومبر 2016 اور 15 نومبر 2021 کو بھی سرکاری نوٹیفکیشن کے ذریعے آئی آر ایف کو غیر قانونی تنظیم قرار دیا گیا تھا۔ ان فیصلوں کی توثیق غیر قانونی سرگرمیاں (روک تھام) ایکٹ کی دفعہ 5 کے تحت قائم ٹریبونل نے کی۔ ٹریبونل نے 22 مئی 2017 اور 30 مارچ 2022 کو اپنے احکامات کے ذریعے پابندی برقرار رکھنے کے فیصلے کو درست ٹھہرایا۔ وزارت داخلہ نے کہا کہ تازہ ترین نوٹیفکیشن اسی قانونی مسلسل عمل کا حصہ ہے اور قومی سلامتی کے تقاضوں کے پیش نظر اسے ضروری سمجھا گیا۔
یہ اعلان نئی دہلی میں وزارت داخلہ کی طرف سے کیا گیا، جب کہ نوٹیفکیشن کی اشاعت سرکاری گزٹ میں کی۔ حکومت نے کہا کہ اس اقدام کا مقصد ایسے بیانیے اور نیٹ ورکس کو محدود کرنا ہے جن کے بارے میں یہ تاثر ہو کہ وہ سماجی ہم آہنگی کو نقصان پہنچاتے ہیں۔ تاہم نوٹیفکیشن میں کسی ممکنہ قانونی چیلنج یا جواب دہی کے عمل کا ذکر نہیں کیا گیا۔
واضح رہے کہ پابندی کی توسیع کے بعد آئی آر ایف کی سرگرمیوں، مالیات اور وابستہ ڈھانچے پر یو اے پی اے کے تحت عائد قدغنیں بدستور نافذ رہیں گی۔ حکومت کے مطابق یہ فیصلہ ملک کے امن و امان، قانون کی حکمرانی اور فرقہ وارانہ بھائی چارے کے تحفظ کے لیے لیا گیا ہے۔
