ملک میں اشیا و خدمات ٹیکس (GST) کی مجموعی وصولی میں ستمبر کے دوران سالانہ بنیاد پر 14.7 فیصد کا اضافہ ریکارڈ کیا گیا اور یہ بڑھ کر 2لاکھ03ہزار 521 کروڑ روپے ہوگئی۔ وزارت خزانہ کی جانب سے جاری اعداد و شمار کے مطابق، جی ایس ٹی وصولی مسلسل تیسرے ماہ 2 لاکھ کروڑ روپے سے زیادہ رہی۔ستمبر میں مرکزی GST (CGST) سے 37,762 کروڑ روپے، ریاستی GST (SGST) سے 45,363 کروڑ روپے جبکہ انٹیگریٹڈ GST (IGST) سے 1,20,396 کروڑ روپے حاصل ہوئے۔
خالص GST آمدنی میں18.1 فیصد اضافہ
ستمبر میں حکومت کی خالص GST آمدنی سالانہ بنیاد پر 18.1 فیصد بڑھ کر 1,76,520 کروڑ روپے ہوگئی۔ اسی دوران مجموعی گھریلو GST آمدنی میں بھی اضافہ دیکھا گیا اور یہ 10.1 فیصد بڑھ کر 1,37,996 کروڑ روپے ہوگئی، جو گزشتہ سال اسی مدت میں 1,25,334 کروڑ روپے تھی۔
رواں مالی سال کے پہلے چھ ماہ یعنی اپریل سے ستمبر کے دوران مجموعی GST وصولی 12,46,278 کروڑ روپے رہی، جو گزشتہ سال کے مقابلے میں 11.6 فیصد زیادہ ہے۔
درآمدات سے حاصل ہونے والے ٹیکس میں نمایاں اضافہ
اگست 2026 میں بھی GST وصولی سالانہ بنیاد پر 14.8 فیصد بڑھ کر 1,99,853 کروڑ روپے رہی تھی۔ اس اضافے میں درآمدات سے حاصل ہونے والے ٹیکس کا نمایاں کردار رہا۔ستمبر کے اعداد و شمار کے مطابق، درآمدات سے حاصل ہونے والی مجموعی GST آمدنی 29 فیصد بڑھ کر 62,604 کروڑ روپے ہوگئی۔دوسری جانب گھریلو GST وصولی بھی مضبوط رہی اور یہ 9.3 فیصد بڑھ کر 1,37,249 کروڑ روپے ہوگئی، جو اگست 2025 میں 1,25,570 کروڑ روپے تھی۔
GST ریفنڈ میں بھی بڑا اضافہ
حکومت کی جانب سے جاری کیے گئے GST ریفنڈ میں بھی نمایاں اضافہ ہوا۔ ستمبر میں مجموعی ریفنڈ 67.9 فیصد بڑھ کر 31,795 کروڑ روپے ہوگیا، جبکہ ایک سال قبل اسی مدت میں یہ رقم 18,935 کروڑ روپے تھی۔
7 اکتوبر کو GST کونسل کی میٹنگ
دریں اثنا، ذرائع کے مطابق 7 اکتوبر کو ہونے والی GST کونسل کی میٹنگ میں کسی بڑے GST شرح میں تبدیلی کا امکان کم ہے۔ امکان ہے کہ اجلاس میں حالیہ شرحوں میں کی گئی معقولیت (Rate Rationalisation) کے نفاذ اور GST کے طریقۂ کار میں اصلاحات پر توجہ دی جائے گی۔ کونسل گزشتہ ایک سال کے دوران GST شرحوں میں کی گئی تبدیلیوں کے نفاذ کا جائزہ بھی لے سکتی ہے۔
مرکزی وزیر خزانہ نرملا سیتارامن پہلے ہی اشارہ دے چکی ہیں کہ 7 اکتوبر کے اجلاس میں GST 2.0 کے تحت عمل درآمد سے متعلق اصلاحات پر توجہ دی جائے گی۔ ان میں ای-انوائسنگ اور ان پٹ ٹیکس کریڈٹ (ITC) کے قواعد جیسے معاملات شامل ہیں۔
