مشرق وسطیٰ میں تیل کی سپلائی میں رکاوٹیں کم ہونے کے امکانات اور متبادل راستوں سے خام تیل کی ترسیل بڑھنے کی توقعات کے باعث خام تیل کی قیمتوں میں مسلسل تیسرے روز کمی ہوئی ہے۔ جمعہ کو برینٹ کروڈ کی قیمت 104 ڈالر فی بیرل سے نیچے آ گئی، جبکہ ویسٹ ٹیکساس انٹرمیڈیٹ (WTI) کروڈ تقریباً 101 ڈالر فی بیرل پر رہا۔ ذرائع کے مطابق برینٹ 103.77 ڈالر اور WTI' 100.88' ڈالر فی بیرل پر آ گیا۔
برینٹ کروڈ کی قیمت گزشتہ دو سیشنز میں بھی تقریباً ایک ایک فیصد کم ہوئی تھی۔ تاجر اس بات کا جائزہ لے رہے ہیں کہ مشرق وسطیٰ میں سپلائی متاثر کرنے والے مسائل میں کتنی جلدی بہتری آ سکتی ہے اور متبادل راستوں سے عالمی منڈیوں تک تیل کی ترسیل کس حد تک برقرار رہ سکتی ہے۔
سعودی عرب کی اہم پائپ لائن بحال کرنے کی تیاری
رپورٹ کے مطابق سعودی عرب کی 1,200 کلومیٹر طویل ایسٹ ویسٹ آئل پائپ لائن کے تین پمپنگ اسٹیشن حالیہ ڈرون حملے میں متاثر ہوئے ہیں۔ پہلے صرف دو اسٹیشن متاثر ہونے کی بات سامنے آئی تھی۔ ذرائع کے مطابق یہ پائپ لائن روزانہ تقریباً 40 لاکھ سے 50 لاکھ بیرل تیل منتقل کرتی رہی ہے، جو عالمی تیل سپلائی کا تقریباً 4 سے 5 فیصد بنتا ہے۔
ذرائع کے مطابق پائپ لائن کی مکمل مرمت میں پانچ سے چھ ہفتے لگ سکتے ہیں، تاہم اس سے پہلے جزوی طور پر تیل کی ترسیل بحال ہونے کا امکان ہے۔ سعودی عرب چند دنوں میں پائپ لائن کی تقریباً نصف صلاحیت بحال کرنے کی کوشش کر رہا ہے۔
تیل کی قیمتوں میں کمی کی ایک اہم وجہ سعودی عرب کی جانب سے اس پائپ لائن کی جزوی بحالی کی کوشش بھی ہے۔ یہ پائپ لائن سعودی عرب کے تیل کے علاقوں کو بحیرہ احمر کے ساحل سے جوڑتی ہے اور آبنائے ہرمز کے راستے تیل کی ترسیل کا متبادل فراہم کرتی ہے۔
سعودی عرب عمان کے قریب متبادل طریقے سے تیل بھیج رہا ہے
رپورٹ کے مطابق سعودی عرب عمان کی بندرگاہ صحار کے قریب شپ ٹو شپ منتقلی کے ذریعے ایشیائی خریداروں کو اضافی خام تیل فراہم کرنے کی کوشش کر رہا ہے۔ اس کا مقصد ایسٹ ویسٹ پائپ لائن کی بندش سے ہونے والی سپلائی میں کمی کو کم کرنا ہے۔
امریکہ اور ایران کے درمیان سفارت کاری پر توجہ
امریکہ اور ایران کے درمیان تنازع کے باعث عالمی تیل منڈی میں سپلائی کے خدشات برقرار ہیں۔ ذرائع کے مطابق دونوں ممالک کے درمیان جون میں ہونے والا عبوری معاہدہ چند ہفتوں بعد ختم ہونے کے بعد سے کوئی امن مذاکرات نہیں ہوئے۔ یہ معاملہ آئندہ ہفتے اقوام متحدہ کی جنرل اسمبلی کے اجلاس میں بھی زیر بحث آنے کی توقع ہے۔
چین بھی سفارتی کوششوں میں شامل ہے۔ رائٹرز کے مطابق چین نے ایران سے حوثیوں کو قابو کرنے میں مدد دینے کی درخواست کی ہے، جبکہ سعودی عرب اور یمن کے ایران حمایت یافتہ حوثیوں کے درمیان بھی حملوں کا سلسلہ جاری ہے۔
آبنائے ہرمز سے تیل کی ترسیل غیر یقینی
آبنائے ہرمز کے ذریعے تیل کی ترسیل کے حوالے سے صورتحال اب بھی غیر یقینی ہے۔ رائٹرز کے مطابق بدھ کو صرف تین تجارتی بحری جہاز آبنائے ہرمز سے گزرے، جبکہ ایک دن پہلے یہ تعداد 12 تھی۔ 10 روزہ اوسط تقریباً 17 بحری جہاز یومیہ رہی ہے۔
ہرمز میں ایک آئل ٹینکر کو نشانہ بنانے کی خبر
رپورٹ کے مطابق ایران کی پاسداران انقلاب کی بحریہ نے کہا ہے کہ جمعرات کو آبنائے ہرمز میں ٹوگو کے پرچم والے ایک آئل ٹینکر کو نشانہ بنایا گیا۔ ایرانی سرکاری میڈیا کے مطابق ٹینکر پر ’غیر قانونی گزرگاہ‘ سے گزرنے کی کوشش کا الزام لگایا گیا۔ اس پیش رفت سے ظاہر ہوتا ہے کہ خطے میں تیل کی سپلائی سے متعلق خطرات اب بھی برقرار ہیں۔
اس سال تیل کی قیمتیں بلند سطح پر
حالیہ کمی کے باوجود خام تیل کی قیمتیں اب بھی 100 ڈالر فی بیرل سے اوپر ہیں۔ مشرق وسطیٰ میں جاری تنازع اور سپلائی میں رکاوٹوں کے باعث عالمی توانائی منڈی پر دباؤ برقرار ہے۔
