سن رائزرز حیدرآباد اور ممبئی انڈینز کے کھلاڑی پہلگام دہشت گردانہ حملے کے متاثرین کے سوگ کے لیے آئی پی ایل میچ کے دوران سیاہ پٹیاں باندھ کر میچ کھیلیں گے ۔ میچ میں کوئی چیئر لیڈرز اور آتش بازی نہیں ہوگی۔ اس واقعے سے پورے ملک میں سوگ کی لہر ہے۔ٹیمیں واقعہ سے متاثرہ افراد کو خراج عقیدت پیش کرنے کے لیے ایک منٹ کی خاموشی بھی اختیار کریں گی۔ واقعے نے ہر کسی کو غمزدہ کر دیا ہے۔بیرونی ممالک کے سربراہ نے بھی اس واقعے کی مذمت کی ہے۔
بتا دیں کہ بی سی سی آئی کے ایک ذریعہ نے پی ٹی آئی کو یہ اطلاع دی ۔دونوں ٹیموں کے کھلاڑی بازو پر سیاہ پٹیاں باندھیں گے اور کشمیر کے پہلگام میں دہشت گردانہ حملے میں اپنی جانیں گنوانے والوں کی یاد میں ایک منٹ کی خاموشی اختیار کریں گے۔انہوں نے کہا، ممبئی انڈینز اور حیدرآباد کے درمیان ہونے والے میچ کے دوران کوئی چیئر لیڈرز نہیں ہوں گے، کوئی پٹاخے نہیں برسائے جائیں گے۔واضح رہے کہ جنوبی کشمیر کے اس مشہور سیاحتی مقام پر منگل کو عسکریت پسندوں کی فائرنگ سے کم از کم 26 افراد ہلاک اور متعدد زخمی ہو گئے۔
یاد رہے کہ ہندوستانی کرکٹ ٹیم نے 2008 کے ممبئی دہشت گردانہ حملوں کے بعد پاکستان کے ساتھ دو طرفہ کرکٹ کے تعلقات منقطع کر لیے اور حال ہی میں چیمپئنز ٹرافی کے لیے ملک کا دورہ کرنے سے انکار کر دیا، جس سے انٹرنیشنل کرکٹ کونسل (آئی سی سی) کو دبئی میں غیر جانبدار مقام فراہم کرنا پڑا۔تاہم تمام سیاسی و سماجی رہنماؤں نے اس واقعے کی مذمت کی ہے۔اور اس حملے میں ملوث دہشت گردوں کی تصویر بھی سامنے آئی ہے۔ اس کی گرفتاری کی کوششیں جاری ہیں۔ واقعے میں دو مقامی دہشت گردوں کے بھی ملوث ہونے کی اطلاعات ہیں۔ فی الحال بڑے پیمانے پر فوجی آپریشن جاری ہے۔
