آل انڈیا مسلم پرسنل لا بورڈ (اے آئی ایم پی ایل بی) نے امریکہ اور اسرائیل کی جانب سے ایران کے خلاف کی گئی مشترکہ اور کھلی کاروائی کی سخت الفاظ میں مذمت کی ہے اور عالمی برادری سے فوری مداخلت کی اپیل کی ہے۔
بورڈ کے ترجمان ڈاکٹر سید قاسم رسول الیاس نے اپنے بیان میں کہا کہ ایران کے جوہری پروگرام کے حوالے سے امریکہ اور ایران کے درمیان جاری مذاکرات میں نمایاں پیش رفت ہو چکی تھی۔ ان مذاکرات میں عمان نے ثالثی کا کردار ادا کیا تھا۔ بیان کے مطابق ایران امریکہ کی بیشتر شرائط ماننے پر آمادہ تھا، لیکن اچانک مذاکرات ختم کرنے کا اعلان اور اس کے فوراً بعد اسرائیل کے ساتھ مل کر ایران پر حملہ اس بات کی نشاندہی کرتا ہے کہ سفارتی عمل کو سنجیدگی سے نہیں لیا گیا۔
ڈاکٹر الیاس نے ایران کے سپریم لیڈر آیت اللہ خامنہ ای کی ہلاکت پر گہرے رنج و غم کا اظہار کرتے ہوئے کہا کہ کسی خودمختار ملک کی قیادت کو جنگ کے دوران نشانہ بنانا بین الاقوامی قوانین اور اقوام متحدہ کے چارٹر کی خلاف ورزی ہے۔
بیان میں کہا گیا کہ اس جنگ نے پورے مشرقِ وسطیٰ کو شدید عدم استحکام سے دوچار کر دیا ہے۔ ایک طرف کئی یورپی ممالک امریکہ کی حمایت کر رہے ہیں جبکہ روس اور چین ایران کے ساتھ کھڑے ہیں۔ اگر فوری اور مؤثر سفارتی اقدامات نہ کیے گئے تو یہ تنازع عالمی بحران کی شکل اختیار کر سکتا ہے، جس کے اثرات پوری دنیا پر مرتب ہوں گے، خصوصاً ترقی پذیر ممالک شدید متاثر ہوں گے۔
بورڈ نے آخر میں اقوام متحدہ اور عالمی برادری سے مطالبہ کیا کہ وہ فوری، سنجیدہ اور عملی اقدامات کے ذریعے جنگ بندی کو یقینی بنائیں تاکہ خطہ مزید تباہی سے محفوظ رہ سکے۔
