الیکشن کمیشن آف انڈیا نے جمعرات کو ووٹر لسٹوں کے خصوصی گہرائی سے نظرثانی (SIR) کے تیسرے مرحلے کا باضابطہ اعلان کر دیا ہے۔ اس مہم کا آغاز 1 جولائی 2026 سے ہوگا اور مختلف مراحل میں دسمبر 2026 تک چلے گا۔اس مہم کے تحت ملک کی 16 ریاستوں اور 3 مرکز کے زیرِ انتظام علاقوں میں ووٹر لسٹوں کو درست کرنے اور غیر ضروری ناموں کو خارج کرنے کا عمل شروع کیا جائے گا۔
ہماچل، جموں و کشمیر اور لداخ استثنیٰ:
کمیشن کے مطابق، ہماچل پردیش، جموں و کشمیر اور لداخ میں یہ عمل ابھی شروع نہیں کیا جائے گا۔ ان علاقوں میں شدید موسم اور برفباری جیسے جغرافیائی چیلنجز کے پیش نظر الیکشن کمیشن ان تینوں خطوں کے لیے بعد میں علیحدہ پروگرام جاری کرے گا۔
قومی مردم شماری کے ساتھ اشتراک:
الیکشن کمیشن کے حکام نے واضح کیا کہ اس پروگرام کو قومی مردم شماری (National Census) کے تحت جاری ہاؤس لسٹنگ کے کاموں کے ساتھ جوڑا گیا ہے۔ اس کا مقصد انتظامی مشنری کا بہتر استعمال یقینی بنانا ہے تاکہ ایک ہی وقت میں دونوں اہم عمل مکمل کیے جا سکیں۔ ہماچل اور دیگر پہاڑی علاقوں میں مشکل زمینی حالات بہتر ہوتے ہی وہاں بھی کام شروع کر دیا جائے گا۔
3.94 لاکھ بی ایل اوز (BLO) گھر گھر جائیں گے:
اس مہم کو بڑے پیمانے پر منظم کرنے کے لیے ،3.94 لاکھ سے زائد بوتھ لیول آفیسرز (BLO) تعینات کیے گئے ہیں۔یہ افسران 36.73 کروڑ ووٹرز کے گھروں تک رسائی حاصل کریں گے۔سیاسی جماعتوں کی جانب سے مقرر کردہ 3.42 لاکھ بوتھ لیول ایجنٹس (BLA) بھی اس عمل میں مدد فراہم کریں گے۔
ان ریاستوں میں ہوگا SIR:
آندھرا پردیش، اروناچل پردیش، ہریانہ، جھارکھنڈ، کرناٹک، مہاراشٹر، منی پور، میگھالیہ، میزورم، ناگالینڈ، اوڈیشہ، پنجاب، سکم، تریپورہ، تلنگانہ، اتراکھنڈ، چنڈی گڑھ، دادرا نگر حویلی، دمن و دیو اور دہلی۔
تیسرے مرحلے کا مکمل شیڈول:
اب تک 5.2 کروڑ نام حذف کیے جا چکے ہیں:
الیکشن کمیشن کے اعداد و شمار کے مطابق، SIR کا پہلا مرحلہ بہار میں اسمبلی انتخابات سے قبل مکمل کیا گیا تھا۔ دوسرا مرحلہ اپریل 2025 سے اپریل 2026 کے درمیان 9 ریاستوں اور 3 مرکز کے زیرِ انتظام علاقوں (بشمول اتر پردیش، مغربی بنگال، تمل ناڈو اور راجستھان) میں چلایا گیا تھا۔ دوسرے مرحلے میں کل 51 کروڑ ووٹرز میں سے تقریباً 5.2 کروڑ مشکوک یا غیر قانونی ووٹرز کے نام لسٹوں سے نکالے گئے ہیں۔
