دہلی ہائی کورٹ نے جموں و کشمیر کے رکن پارلیمنٹ انجینئر رشید کی عرضی پر سماعت 25 مارچ تک ملتوی کر دی ہے۔ این آئی اے نے پیر کو جوابی حلف نامہ داخل کیا تھا۔این آئی اے نے جسٹس چندر دھاری سنگھ اور انوپ جے بھمبھانی کی بنچ کو بتایا کہ ٹرائل کورٹ 19 مارچ کو رشید کی ضمانت کی عرضی پر فیصلہ سنائے گی۔ ایسی صورتحال میں سماعت ملتوی کر دی جائے۔ جس کے بعد عدالت نے کیس کی سماعت 25 مارچ تک ملتوی کردی۔
نیشنل انویسٹی گیشن ایجنسی نے بارہمولہ کے ایم پی انجینئر رشید کی حراستی پیرول کی مخالفت کی۔ این آئی اے نے عدالت کو بتایا کہ انجینئر رشید کو قید کی سختیوں سے بچنے کے لیے اپنی پارلیمانی حیثیت کا استعمال کرنے کی اجازت نہیں دی جا سکتی۔بتا دیں کہ رشید نے 10 مارچ کے ٹرائل کورٹ کے حکم کے خلاف عرضی دائر کی ہے، جس میں انہیں لوک سبھا کی کارروائی میں شرکت کے لیے 4 اپریل تک حراستی پیرول یا عبوری ضمانت دینے سے انکار کر دیا گیا تھا۔
تحقیقاتی ایجنسی نے کہا کہ ایم پی کو انسداد دہشت گردی قانون، غیر قانونی سرگرمیاں (روک تھام) ایکٹ (یو اے پی اے) کے تحت سنگین الزامات کا سامنا ہے۔ این آئی اے نے دلیل دی کہ رشید کو نہ تو عبوری ضمانت دی جا سکتی ہے اور نہ ہی حراست میں پیرول دیا جا سکتا ہے کیونکہ اسے قانونی حراست میں رہتے ہوئے پارلیمنٹ کے اجلاس میں شرکت کا کوئی قابل عمل حق نہیں ہے۔ ایجنسی نے ان پر فورم شاپنگ اور قانون کے عمل کو غلط استعمال کرنے کا الزام لگایا۔
