جمعرات کے روز قیمتی دھاتوں کی عالمی اور مقامی منڈیوں میں غیر معمولی گراوٹ دیکھنے میں آئی، جہاں سونے اور چاندی کی قیمتیں شدید دباؤ کے باعث کئی ہفتوں کی کم ترین سطح پر پہنچ گئیں۔ یہ صورتحال ایسے وقت میں سامنے آئی ہے جب مغربی ایشیا میں جغرافیائی و سیاسی کشیدگی بدستور برقرار ہے، تاہم اس کے باوجود سرمایہ کاروں کی جانب سے فروخت کے بڑھتے رجحان نے مارکیٹ کو نیچے کی جانب دھکیل دیا۔
سونا 147889 فی دس گرام
انڈیا بلین اینڈ جیولرز ایسوسی ایشن (IBJA) کے مطابق 24 قیراط سونے (999 خالصیت) کی قیمت گھٹ کر 1,47,889 روپے فی 10 گرام ہو گئی، جو گزشتہ سیشن میں 1,54,879 روپے تھی۔ اس طرح صرف ایک دن میں سونے کی قیمت میں 6,990 روپے کی نمایاں کمی درج کی گئی۔
چاندی فی کلو20ہزار روپئے ہوئی کم
چاندی کی قیمتوں میں بھی بڑی گراوٹ ریکارڈ کی گئی۔ 999 خالصیت والی چاندی کی قیمت کم ہو کر 2,29,873 روپے فی کلوگرام رہ گئی، جبکہ ایک روز قبل یہ 2,49,907 روپے فی کلوگرام تھی۔ اس طرح چاندی کی قیمت میں 20,034 روپے فی کلوگرام کی بھاری کمی واقع ہوئی۔
بازار مسلسل دباؤ کا شکار
گزشتہ ایک ہفتے کے دوران سونے کی قیمتوں میں 12,000 روپے سے زائد جبکہ چاندی کی قیمتوں میں 38,000 روپے سے زیادہ کی کمی واقع ہو چکی ہے، جو اس بات کی نشاندہی کرتی ہے کہ قیمتی دھاتوں کی مارکیٹ مسلسل دباؤ کا شکار ہے۔
ایم سی ایکس کا رجحان
ملٹی کموڈیٹی ایکسچینج (MCX) پر بھی یہی رجحان دیکھنے میں آیا۔ شام کی تجارت کے دوران اپریل ڈیلیوری کے سونے کے سودے 1,42,516 روپے فی 10 گرام پر ٹریڈ ہو رہے تھے، جو کہ 6.87 فیصد یا 10,509 روپے کی کمی کو ظاہر کرتا ہے۔ اسی طرح مئی ڈیلیوری کی چاندی 2,23,400 روپے فی کلوگرام پر رہی، جس میں 11.94 فیصد یا 30,297 روپے کی نمایاں گراوٹ دیکھی گئی۔دن کے دوران سونے کے اپریل فیوچر نے 1,51,941 روپے پر آغاز کیا، 1,52,449 روپے کی بلند ترین سطح کو چھوا، تاہم بعد ازاں گر کر 1,41,121 روپے تک پہنچ گیا، جو فروری کے اوائل کے بعد کی کم ترین سطح ہے۔ چاندی کے مئی فیوچر نے 2,45,000 روپے سے شروعات کی، 2,45,674 روپے کی بلند سطح تک گیا، لیکن پھر 2,14,212 روپے فی کلوگرام کی نچلی سطح تک گر گیا۔
قیمتوں میں اْتار چڑھاؤ مغربی کشیدگی کانتیجہ
ماہرین کے مطابق اس شدید اتار چڑھاؤ کی بنیادی وجوہات میں مغربی ایشیا کی کشیدہ صورتحال، امریکی ڈالر میں اتار چڑھاؤ اور خام تیل کی قیمتوں میں غیر یقینی شامل ہیں۔ بالخصوص امریکہ اور ایران کے درمیان ممکنہ کشیدگی نے عالمی منڈیوں میں بے چینی پیدا کر دی ہے، جس کے اثرات قیمتی دھاتوں کی قیمتوں پر بھی واضح طور پر نظر آ رہے ہیں۔
سرمایہ داروں کو مشورہ
ماہرین کا یہ بھی کہنا ہے کہ اگر یہی رجحان برقرار رہا تو آئندہ دنوں میں سونے اور چاندی کی قیمتوں میں مزید اتار چڑھاؤ دیکھنے کو مل سکتا ہے، جس سے سرمایہ کاروں کو محتاط رہنے کی ضرورت ہے۔
