ایک حیدرآبادی خاتون نے منگل کو سعودی عرب کے الخبر شہر میں مبینہ طور پر اپنے تین بچوں کو قتل کردیا اور بعد میں خودکشی کی کوشش کی۔ خاتون کی شناخت سیدہ حمیرا امرین کے طور پرہوئی ہے۔ جو کہ محمدی لائنز، ٹولی چوکی، حیدرآباد کی رہنے والی ہے۔ خاتون نے مبینہ طور پر اپنے جڑواں بیٹوں 7 سالہ صادق احمد اور عادل احمد اور اس کے چھوٹے بیٹے 3سالہ یوسف احمد کو ان کی رہائش گاہ پر باتھ ٹب میں ڈبو دیا۔
خاندانی ذرائع کے مطابق بچوں کو قتل کرنے کے بعد اس نے اپنی زندگی ختم کرنے کی کوشش کی۔ خاتون کے شوہر محمد شاہنواز شام کو کام
سے گھر واپس آئے اور بچوں کو مردہ دیکھ کر حیران رہ گئے۔ شاہنواز نے فوراً مقامی پولیس کو اطلاع دی۔
خاتون اور اس کے بچے وزٹ ویزا پر سعودی عرب میں تھے۔ اہل خانہ کا کہنا تھا کہ وہ ذہنی صحت کے مسائل اور تنہائی کا شکار تھی، جب کہ ذرائع نے یہ بھی بتایا کہ خاندانی جھگڑے بھی تھے۔ واقعے کے پیچھے اصل وجوہات کا ابھی تک پتہ نہیں چل سکا ہے۔ سعودی پولیس نے تحقیقات کا آغاز کر دیا ہے۔
