اسرائیلی دفاعی افواج (IDF) نے جنوری 2024 میں پیش آنے والے ہند رجب کیس میں ایک اہم اعتراف کرتے ہوئے کہا ہے کہ اسرائیلی اہلکاروں نے غزہ شہر سے نکلنے کی کوشش کرنے والی پانچ سالہ فلسطینی بچی ہند رجب اور اس کے اہل خانہ کی گاڑی پر فائرنگ کی تھی۔ اسرائیلی فوج اس سے قبل جائے وقوعہ پر اپنے اہلکاروں کی موجودگی سے انکار کرتی رہی تھی۔ تاہم اب فوجی پولیس ڈویژن نے واقعے کے ساتھ ساتھ ہند کو بچانے کے لیے جانے والی فلسطینی ہلال احمر کی ایمبولینس پر فائرنگ کے معاملے میں مجرمانہ تحقیقات شروع کرنے کا فیصلہ کیا ہے۔
ہند رجب کی آخری فون کال
جنوری 2024 میں پانچ سالہ ہند رجب اپنے خاندان کے افراد کے ساتھ گاڑی میں سوار تھی، جب ان کی گاڑی فائرنگ کی زد میں آ گئی۔ حملے میں گاڑی میں موجود خاندان کے بیشتر افراد ہلاک ہو گئے۔ ہند کی 15 سالہ کزن لیان حمادہ نے فلسطینی ہلال احمر سے فون پر رابطہ کر کے مدد کی اپیل کی۔ فون کال کے دوران اس نے بتایا کہ گاڑی پر فائرنگ ہوئی ہے اور خاندان کے افراد مارے جا چکے ہیں۔ بعد میں رابطہ منقطع ہو گیا اور ہند گاڑی میں اکیلی زندہ رہ گئی۔
ایمبولینس بھی فائرنگ کی زد میں
ہند کو بچانے کے لیے فلسطینی ہلال احمر کی ایک ایمبولینس جائے وقوعہ کی طرف روانہ ہوئی، تاہم اسے بھی فائرنگ کا نشانہ بنایا گیا۔ اس واقعے میں ایمبولینس میں موجود دو امدادی کارکن بھی ہلاک ہو گئے۔تقریباً 12 دن بعد، اسرائیلی فوج کے علاقے سے پیچھے ہٹنے کے بعد ہند رجب، اس کے خاندان کے چھ افراد اور دونوں امدادی کارکنوں کی لاشیں برآمد کی گئیں۔
تحقیقات پر بھی سوالات
ہند کی مدد کے لیے کی جانے والی آخری فون کال کی ریکارڈنگ سامنے آنے کے بعد یہ واقعہ دنیا بھر میں شدید غم و غصے اور انسانی حقوق کے حوالے سے بحث کا باعث بنا تھا۔اسرائیلی فوج کی جانب سے اب مجرمانہ تحقیقات شروع کرنے کے فیصلے کے باوجود ہند رجب فاؤنڈیشن اور بعض انسانی حقوق کی تنظیموں نے داخلی تحقیقات پر تحفظات کا اظہار کیا ہے۔ ان کا کہنا ہے کہ ماضی کے تجربات کی بنیاد پر صرف داخلی تحقیقات کافی نہیں اور واقعے کی آزاد اور بین الاقوامی سطح پر تحقیقات ہونی چاہئیں۔ ہند رجب کا معاملہ غزہ جنگ کے دوران شہریوں اور امدادی کارکنوں کے تحفظ، فوجی کارروائیوں میں جواب دہی اور انصاف کے نظام پر ایک بار پھر سنگین سوالات اٹھا رہا ہے۔
