ریئلٹی شو 'لاک اپ 2' سے باہر ہونے کے بعد بزنس وومن مادھوری گروور ایک بار پھر اپنے متنازعہ بیانات کی وجہ سے خبروں میں ہیں۔ شو کے دوران غریب خاندانوں اور بچوں سے متعلق ان کے ریمارکس پر سوشل میڈیا پر شدید ردعمل سامنے آیا تھا، اور اب شو سے باہر آنے کے بعد بھی انہوں نے اپنے مؤقف سے پیچھے ہٹنے کے بجائے اس کا دفاع کیا ہے۔
اداکارہ تیجسوی پرکاش کے ساتھ گفتگو میں مادھوری گروور سے ان کے وائرل بیان کے بارے میں سوال کیا گیا۔ اس پر انہوں نے کہا کہ ان کے بیان کو غلط انداز میں پیش کیا گیا۔ ان کا کہنا تھا کہ انہوں نے کسی کو بچے پیدا نہ کرنے کا مشورہ نہیں دیا، بلکہ صرف یہ کہا تھا کہ جتنے زیادہ بچے امیر لوگوں کے ہوتے ہیں، ان کی دولت بڑھتی ہے، جبکہ غریب لوگوں کے زیادہ بچے ہونے سے غربت میں اضافہ ہوتا ہے۔
گفتگو کے دوران تیجسوی پرکاش نے اس موضوع کو حساس قرار دیتے ہوئے کہا کہ اسے مختلف زاویوں سے دیکھا جا سکتا ہے، تاہم مادھوری گروور اپنے موقف پر قائم رہیں۔ انہوں نے کہا کہ "ملک کو امیر لوگ چلاتے ہیں، روزگار بھی وہی پیدا کرتے ہیں۔" ان کے مطابق اگر غریب لوگ ملک چلا رہے ہوتے تو صورتحال مختلف ہوتی، لیکن حقیقت میں معیشت کو آگے بڑھانے میں سرمایہ کار اور کاروباری طبقہ اہم کردار ادا کرتا ہے۔
تیجسوی پرکاش نے بارہا ان سے اختلاف کرتے ہوئے متوازن نقطۂ نظر پیش کرنے کی کوشش کی، مگر مادھوری نے اپنے خیالات تبدیل کرنے سے انکار کر دیا۔ بعد ازاں جب سوشل میڈیا پر ہونے والی تنقید کا ذکر کیا گیا تو مادھوری نے کہا کہ بہت سے لوگ خود کو مظلوم ظاہر کرنا پسند کرتے ہیں۔ ان کے مطابق اگر کوئی شخص خود کو غریب سمجھتا ہے تو وہ ہر بات کو اسی تناظر میں دیکھے گا۔
یاد رہے کہ 'لاک اپ 2' میں مادھوری گروور نے اپنے خاندان کے بارے میں بات کرتے ہوئے انکشاف کیا تھا کہ وہ اور ان کے شوہر اشنیر گروور تیسرے بچے کے خواہش مند تھے، تاہم خاندان کے دیگر افراد اس کے حق میں نہیں تھے۔ اسی گفتگو کے دوران انہوں نے کہا تھا کہ "تیسرا بچہ انسان کو جوان رکھتا ہے" اور مثال دیتے ہوئے کہا تھا کہ کئی کامیاب اور امیر افراد کے تین بچے ہیں۔
انہوں نے مزید کہا تھا کہ "ہم دو، ہمارے دو" کا اصول ہر خاندان پر یکساں طور پر لاگو نہیں ہوتا۔ ان کے مطابق زیادہ وسائل رکھنے والے خاندان زیادہ بچوں کی بہتر پرورش کر سکتے ہیں، جبکہ محدود وسائل والے خاندانوں میں زیادہ بچوں سے معاشی مشکلات بڑھ سکتی ہیں۔
مادھوری گروور کے ان بیانات پر سوشل میڈیا پر ملا جلا ردعمل سامنے آیا ہے۔ بعض صارفین نے ان کے خیالات کو غریب طبقے کی توہین قرار دیا، جبکہ کچھ لوگوں کا کہنا ہے کہ آبادی اور وسائل کے درمیان توازن پر بحث کی جا سکتی ہے، تاہم ایسے موضوعات پر اظہارِ خیال کرتے وقت الفاظ کے انتخاب میں احتیاط ضروری ہوتی ہے تاکہ کسی طبقے کی دل آزاری نہ ہو۔
واضح رہے کہ 'لاک اپ 2' کی میزبانی رتیش دیش مکھ اور فرح خان کر رہے ہیں، جبکہ شو کی نئی اقساط ہفتہ سے بدھ تک نیٹ فلکس پر نشر کی جا رہی ہیں۔ مادھوری گروور کے علاوہ سنیتا آہوجا اور ریاض علی بھی حال ہی میں شو سے باہر ہو چکے ہیں۔
