مہاراشٹر میں مسلم کمیونٹی کے خلاف بڑھتا ہوا فرقہ وارانہ تشدد اور ماب لنچنگ کے واقعات تشویشناک ہیں۔ اس مسئلہ پر توجہ مبذول کراتے ہوئے اورنگ آباد ضلع کے سلوڈ اسمبلی حلقہ کے ایم ایل اے عبدالستار نے تشویش کا اظہار کیا۔ ناندیڑ، جامنیر اور جلگاؤں اضلاع میں ہونے والے واقعات کا حوالہ دیتے ہوئے ایم ایل اے عبدالستار نے کہا کہ کچھ مقامی لوگ منظم طریقے سے مذہبی جذبات کو بھڑکا رہے ہیں، جس سے فرقہ وارانہ کشیدگی میں اضافہ ہوا ہے۔ انہوں نے کہا کہ ایسی حرکتوں سے معاشرے میں بداعتمادی اور خوف کی فضا پیدا ہو رہی ہے۔
عبدالستار نے کہا کہ اقلیتی برادریوں کو نشانہ بنانے کا رجحان واضح طور پر بڑھ رہا ہے۔ انہوں نے اپنے حلقہ انتخاب سلوڈ کی مثال دیتے ہوئے کہا کہ کچھ لوگوں کو بغیر مناسب تصدیق کے بنگلہ دیشی شہری قرار دیا جا رہا ہے اور ان کی شناخت پر سوال اٹھائے جا رہے ہیں جو کہ ایک انتہائی سنگین معاملہ ہے۔ انہوں نے واضح کیا کہ جو لوگ واقعی غیر ملکی شہری ہیں انہیں سخت قانونی کارروائی کا سامنا کرنا چاہئے لیکن ہندوستانی شہریوں کے ساتھ ایسا سلوک ان کے جذبات کو شدید ٹھیس پہنچاتا ہے اور نظام پر اعتماد کو مجروح کرتا ہے۔
ایم ایل اے نے مزید کہا کہ کچھ معاملات میں، پوری کمیونٹی کو جھوٹے الزامات کے ذریعے نشانہ بنایا جا رہا ہے، مبینہ طور پر بعض سیاسی گروہوں کے دباؤ میں۔ انہوں نے مطالبہ کیا کہ ایسے جھوٹے مقدمات کو فوری طور پر واپس لیا جائے تاکہ انصاف اور سچائی کا بول بالا ہو سکے۔
انہوں نے مزید کہا کہ کسی بھی فرد کے خلاف صرف اس کی مذہبی شناخت کی بنیاد پر کاروائی کرنا سراسر غلط ہے۔ انہوں نے زور دے کر کہا کہ مجرمانہ سرگرمیاں کسی ایک مذہب یا برادری تک محدود نہیں ہیں بلکہ سماج کے ہر طبقے میں سماج دشمن عناصر پائے جاتے ہیں۔ انہوں نے حکومت سے اپیل کی کہ وہ ان مقدمات پر خصوصی توجہ دے اور اس بات کو یقینی بنائے کہ قانون کا نفاذ منصفانہ اور بلا امتیاز ہو۔
