مغربی بنگال کے مشرقی بردوان میں جمعہ کی صبح نیشنل ہائی وے نمبر 19 پر فیری گھاٹ اور فاگوپور کے درمیان سڑک پر کھڑے ٹرک سے عقیدت مندوں سے بھری بس ٹکرا گئی۔ بس میں سوار تقریباً 10 افراد ہلاک ہو گئے۔ جبکہ 36 افراد کے زخمی ہونے کی اطلاع ہے۔ بتایا جا رہا ہے کہ عقیدت مندوں سے بھری یہ بس بہار کے موتیہاری ضلع کے چرایا تھانہ کے سرسوا گھاٹ علاقے سے مغربی بنگال پہنچی تھی۔حادثے میں بس کو بری طرح نقصان پہنچا اور بس میں سوار 10 افراد ہلاک ہوگئے۔ تقریباً 36 افراد زخمی بتائے جاتے ہیں۔ زخمیوں کو مقامی لوگوں نے فوری طور پر بچایا اور علاج کے لیے بردوان میڈیکل کالج لے جایا گیا، جہاں ان کا علاج جاری ہے۔
حادثہ کیسے ہوا؟
عینی شاہدین نے پولیس کو بتایا کہ مسافر بس بہت تیز رفتار سے جا رہی تھی کہ وہ بے قابو ہو گئی اور سڑک کے کنارے کھڑے ٹرک کو نہیں دیکھ سکی۔ بس نے ٹرک کو پیچھے سے ٹکر مار دی جس سے آگے کا حصہ بری طرح تباہ ہوگیا۔ بس ڈرائیور کی بھی موت ہو گئی ہے۔ پولیس نے ابھی تک حادثے کی وجہ کے بارے میں کوئی اطلاع نہیں دی ہے۔ فی الحال معاملہ زیر تفتیش ہے۔وہیں معلومات کے مطابق بس میں سوار تمام لوگ بہار کے رہنے والے تھے۔ وہ موتیہاری ضلع کے چرایا تھانہ کے سرسوا گھاٹ علاقے سے گنگا میں نہانے کے لیے بنگال گئے تھے۔ نہانے کے بعد واپس لوٹتے ہوئے فاگوپور کے قریب حادثہ پیش آیا۔ واقعہ کے وقت بس درگاپور کی طرف جارہی تھی۔ بس میں زیادہ تر مسافر خواتین اور بچے تھے۔ ٹرک سے تصادم کے بعد متعدد مسافر بس میں پھنس گئے جنہیں بڑی مشکل سے باہر نکالا گیا۔
بس میں سفر کرنے والے عقیدت مندوں کا تعلق بہار سے تھا۔
واقعے کے بعد مقامی باشندوں نے قومی شاہراہ پر کھڑی گاڑیوں پر تشویش کا اظہار کیا۔ ان کا کہنا تھا کہ اس کی سختی سے ممانعت ہونی چاہیے۔ جس سے بڑے حادثات ہو سکتے ہیں۔ فی الحال پولس معاملے کی تحقیقات کر رہی ہے۔ رپورٹ میں کہا گیا ہے کہ عقیدت مندوں سے بھری بس بہار کے موتیہاری ضلع کے چرایا تھانہ کے سرسوا گھاٹ علاقے سے مغربی بنگال پہنچی تھی، جو بنگال کے مختلف مذہبی مقامات اور ہوگلی ضلع کے تارکیشور دھام کا دورہ کرنے کے بعد بہار واپس لوٹ رہی تھی۔
