مسلسل شدید بارش نے ممبئی اور اس کے ملحقہ علاقوں میں معمول کی زندگی متاثر کر دی ہے۔ کئی مقامات پر پانی جمع ہونے کے باعث مسافروں، پیدل چلنے والوں اور گاڑیوں ڈرائیوروں کو مشکلات کا سامنا کرنا پڑ رہا ہے۔
ہفتے کی رات سے جاری بارش کے نتیجے میں نالاسوپارہ ریلوے اسٹیشن کے مشرقی جانب پانی جمع ہو گیا۔ پانی بھرنے کے باوجود مسافر اپنی منزل تک پہنچنے کے لیے جمع شدہ پانی سے گزرنے پر مجبور رہے۔ بارش کے دوران اسٹیشن کے احاطے میں بھی مسافروں کی بڑی تعداد موجود رہی۔
وسائی ویرار شہر میں بھی ہفتے کی رات سے شدید بارش کا سلسلہ جاری ہے۔ نالاسوپارہ کی کئی سڑکوں، خاص طور پر سینٹر پارک اور ٹولنج برج کے آس پاس کے علاقوں میں پانی جمع ہو گیا، جس کے باعث صبح کے وقت گاڑیوں کے ڈرائیوروں اور پیدل چلنے والوں کو پریشانی کا سامنا کرنا پڑا۔
ممبئی کے دادار علاقے میں بھی شدید بارش جاری رہی، جس سے وہاں سے گزرنے والے مسافر متاثر ہوئے۔ مسلسل بارش کے بعد ریلوے ٹریک بھی پانی میں ڈوب گئے، جس سے اسٹیشن اور اس کے اطراف آمدورفت متاثر ہوئی۔
محکمہ موسمیات (IMD) نے اتوار کے لیے ممبئی، تھانے اور پالگھر میں ’یلو الرٹ‘ جاری کیا ہے۔ محکمہ کے مطابق ان علاقوں میں گرج چمک کے ساتھ ہلکی سے درمیانی بارش ہو سکتی ہے، جبکہ بعض مقامات پر شدید بارش کا بھی امکان ہے۔ اس دوران 40 سے 50 کلومیٹر فی گھنٹہ کی رفتار سے تیز ہوائیں چلنے کی پیش گوئی بھی کی گئی ہے۔
'IMD' کے مطابق ممبئی میں پیر کے روز بھی بارش کا سلسلہ جاری رہنے کا امکان ہے۔ موجودہ موسمی حالات کے پیش نظر شہر اور اس کے ملحقہ علاقوں میں مزید بارش متوقع ہے۔ ممبئی میں آج مشہور گنیش تہوار کا پہلا دن بھی ہے۔ محکمہ موسمیات نے دن بھر درمیانی درجے کی بارش کی پیش گوئی کی ہے۔ گنیش مورتیوں کے وسرجن کے جلوس منگل سے شروع ہونے ہیں اور موسم کی پیش گوئی کے مطابق اس دن بھی شہر میں ہلکی سے درمیانی بارش کا امکان ہے۔
