ہندوستان کے وزیر اعظم نریندر مودی جمعہ 15 مئی کو متحدہ عرب امارات کے دارالحکومت ابوظہبی پہنچے، جہاں ان کا انتہائی شاندار اور پرتپاک استقبال کیا گیا۔ متحدہ عرب امارات کے صدر محمد بن زاید النہیان نے وزیر اعظم کا خیرمقدم کیا جبکہ انہیں گارڈ آف آنر بھی پیش کیا گیا۔
اس دورے کی سب سے خاص جھلک اُس وقت دیکھنے کو ملی جب وزیر اعظم کا طیارہ متحدہ عرب امارات کی فضائی حدود میں داخل ہوا۔ اس موقع پر متحدہ عرب امارات کے لڑاکا طیاروں نے وزیر اعظم کے طیارے کو حفاظتی حصار میں لے کر استقبال کیا، جس کی ویڈیو بھی سوشل میڈیا پر تیزی سے وائرل ہو رہی ہے۔
وزیر اعظم کے اس دورے کا مقصد دونوں ممالک کے درمیان اسٹریٹجک اور اقتصادی تعلقات کو مزید مضبوط بنانا بتایا جا رہا ہے۔ اس دوران تجارت، سرمایہ کاری، توانائی کی سلامتی اور عوامی روابط جیسے اہم معاملات پر تفصیلی گفتگو ہوگی۔
ذرائع کے مطابق، توانائی کی سلامتی اس ملاقات کا اہم موضوع ہوگی، جبکہ مائع گیس اور اسٹریٹجک پیٹرولیم ذخائر سے متعلق اہم معاہدوں پر دستخط بھی متوقع ہیں۔
وزارت خارجہ کے مطابق، متحدہ عرب امارات گزشتہ کئی برسوں سے ہندوستان کا ایک بڑا تجارتی شراکت دار رہا ہے۔ اس کے علاوہ وہاں لاکھوں ہندوستانی مقیم ہیں، اس لیے یہ دورہ تارکین وطن سے متعلق امور کے حوالے سے بھی اہم سمجھا جا رہا ہے۔
اطلاعات کے مطابق، متحدہ عرب امارات کے بعد وزیر اعظم ہالینڈ اور پھر سویڈن کا دورہ بھی کریں گے، جہاں دوطرفہ تعلقات، تجارت اور سرمایہ کاری کے شعبوں میں تعاون بڑھانے پر بات چیت کی جائے گی۔
