وزیر اعظم نریندر مودی شمال مشرق کے دو روزہ دورے پر ہیں۔ میزورم کے بعد آج وہ منی پور پہنچے ہیں ۔ منی پور میں تشدد پھوٹنے کے بعد وزیر اعظم کا یہ پہلا دورہ ہے۔ وزیر اعظم نے چورا چند پور میں خواتین اور لڑکیوں سے بات کی۔ لڑکیوں نے وزیراعظم کو روایتی ٹوپی پہنائی اور انہیں ایک تصویر تحفے میں دی۔ اس کے بعد انہوں نے چورا چند پور میں ایک ریلی سے خطاب کیا اور 3,600 کروڑ روپے سے زیادہ کے کئی ترقیاتی منصوبوں کا افتتاح اور سنگ بنیاد رکھا۔
منی پور ہمت اور بہادری کی سرزمین :پی ایم مودی
وزیر اعظم نے کہا، منی پور کی سرزمین ہمت اور بہادری کی سرزمین ہے۔ یہ پہاڑی لوگوں کی محنت کی علامت ہے۔ منی پور سرحد سے متصل ریاست ہے۔ یہاں رابطہ ہمیشہ سے ایک چیلنج رہا ہے۔ میں نے اس بات پر زور دیا ہے کہ منی پور کے رابطے کے لیے مسلسل کام کیا جانا چاہیے۔ اس کے لیے دو سطحوں پر کام کیا گیا، پہلے ہم نے ریلوے لائنوں میں کئی گنا اضافہ کیا۔ شہروں کے ساتھ دیہاتوں کو سڑکیں فراہم کرنے پر رکھی گئی ہے۔
وزیراعظم نے کن منصوبوں کا آغاز کیا؟
وزیر اعظم نے چورا چند پور میں سڑک، نکاسی آب اور اثاثہ جات کے انتظام میں بہتری کے پروجیکٹ اور 550 کروڑ روپے کے منی پور انفوٹیک ڈیولپمنٹ (MIND) پروجیکٹ کا افتتاح کیا۔ اس کے علاوہ وزیر اعظم نے 2500 کروڑ روپے کے 5 قومی شاہراہ پروجیکٹوں اور 9 خواتین کے ہاسٹلوں کا بھی افتتاح کیا۔ وہ امپھال میں 538 کروڑ روپے کی لاگت سے بنائے گئے سیکرٹریٹ، 101 کروڑ روپے کی لاگت سے بنائے گئے پولیس ہیڈ کوارٹر، 4 اضلاع میں خواتین کے لیے آئمہ بازار اور منی پور بھون کا افتتاح کریں گے۔
راہل گاندھی نے کیا کہا؟
کانگریس کے رکن پارلیمنٹ راہول گاندھی نے پی ایم مودی کے منی پور دورے کا خیرمقدم کیا۔ انہوں نے کہا، منی پور کا مسئلہ کافی عرصے سے چل رہا ہے، یہ اچھی بات ہے کہ پی ایم اب جا رہے ہیں۔ دریں اثنا، کانگریس کے صدر ملیکارجن کھرگے نے کہا، وزیر اعظم کا منی پور کا صرف 3 گھنٹے کا دورہ ہمدردی کا کام نہیں ہے بلکہ ایک دھوکہ اور زخمی لوگوں کی توہین ہے۔ امپھال اور چورا چند پور میں آپ کا نام نہاد روڈ شو ریلیف کیمپوں میں لوگوں کی فریاد سننے سے بچنے کی بزدلانہ کوشش ہے۔
وزیراعظم کے دورہ سے قبل حکومت اور کوکی تنظیموں کے درمیان معاہدہ:
وزیر اعظم کے منی پور کے دورے سے پہلے 4 ستمبر کو مرکزی حکومت ، منی پور حکومت، کوکی آرگنائزیشن (KZC) اور یونائیٹڈ پیپلز فرنٹ کے درمیان دہلی میں ایک معاہدہ طے پایا تھا۔ اس کے بعد، کوکیوں نے منی پور کو ناگالینڈ-شمال مشرق سے جوڑنے والی قومی شاہراہ-2 کو کھول دیا ہے۔ تشدد شروع ہونے کے بعد سے یہ شاہراہ بند تھی۔ اب کوکی اور میتی کے علاقوں میں عام لوگوں اور ضروری سامان کی آمدورفت بغیر کسی رکاوٹ کے ہو رہی ہے۔
منی پور تشدد میں 300 سے زیادہ ہلاک:
منی پور میں کوکی اور میتی برادریوں کے درمیان تشدد 3 مئی 2023 کو شروع ہوا، جو آج بھی وقفے وقفے سے جاری ہے۔اس تشدد میں 300 سے زائد افراد ہلاک، 1500 سے زائد زخمی اور ہزاروں لوگ بے گھر ہو چکے ہیں۔دباؤ میں آکر وزیر اعلیٰ این بیرن سنگھ نے ڈیڑھ سال بعد 9 فروری 2025 کو استعفیٰ دے دیا۔ اس کے بعد ریاست میں 13 فروری سے صدر راج نافذ ہے۔
