7e7a6c4d-724e-4e78-ace0-05d7daaff04a2522026181013.jpg)
بہار میں شراب بندی قانون پر جاری سیاسی تنازع کے درمیان راشٹریہ جنتا دل (آر جے ڈی) نے بڑا دعویٰ کر دیا ہے۔ آر جے ڈی کے ایم ایل سی سنیل سنگھ نے میڈیا سے گفتگو کرتے ہوئے کہا کہ ایسی کوئی جگہ نہیں جہاں پیسے دینے پر شراب کی ڈیلیوری نہ ہو سکے۔ انہوں نے چیلنج دیتے ہوئے کہا کہ اگر ثابت کرنا ہے تو اسمبلی کے آخری دن 27 تاریخ کو وہ خود اسمبلی کے باہر شراب کی ڈیلیوری کروا کر دکھا دیں گے۔
سنيل سنگھ نے کہا کہ 2016 میں جب ریاست میں شراب بندی قانون نافذ ہوا، اس سے پہلے جتنی شراب کی کھپت تھی، پابندی کے بعد اس سے کئی گنا زیادہ ہو چکی ہے۔ ان کا کہنا تھا کہ یہ بات کسی سے پوشیدہ نہیں۔ انہوں نے کہا کہ بہار کا رقبہ تقریباً 94 ہزار مربع کلومیٹر ہے اور اس کی سرحدیں اتر پردیش، مغربی بنگال، جھارکھنڈ اور نیپال سے ملتی ہیں، جہاں شراب بندی نافذ نہیں ہے۔ ایسے میں یہ تصور کرنا ممکن نہیں کہ بہار میں شراب کی آمد مکمل طور پر رک جائے۔
آر جے ڈی رہنما نے کہا کہ آج نوجوان نسل بری طرح متاثر ہو رہی ہے۔ جنہیں شراب نہیں ملتی وہ دوسرے نشوں کی طرف مائل ہو رہے ہیں۔ انہوں نے وزیر اعلیٰ کا نام لیے بغیر کہا کہ غلط پالیسیوں کے باعث اگر کوئی یہ سوچتا ہے کہ شراب بندی سے اسے راجہ رام موہن رائے کی طرح یاد رکھا جائے گا تو یہ محض خوش فہمی ہے۔
انہوں نے مزید کہا کہ بہار میں جہیز کے خلاف قانون موجود ہونے کے باوجود کیا کسی بچی کی شادی بغیر جہیز کے ہو رہی ہے؟ اسی طرح نشہ بندی کی بھی یہی حالت ہے۔ انہوں نے دعویٰ کیا کہ وزیر اعلیٰ کی رہائش گاہ "این مارگ" اور اس کے آس پاس کے علاقوں حتیٰ کہ راج بھون کے قریب بھی مبینہ طور پر ڈیلیوری پوائنٹس موجود ہیں، تاہم انہوں نے کہا کہ وہ اس معاملے کی پرت در پرت تفصیل بیان نہیں کرنا چاہتے۔ بہار میں شراب بندی قانون پر سیاسی بیان بازی تیز ہو گئی ہے اور آنے والے دنوں میں اس مسئلے پر مزید ہنگامہ آرائی کے امکانات ظاہر کیے جا رہے ہیں۔
