تلنگانہ کے چیف منسٹر اے ریونت ریڈی نے منگل کو نئی دہلی میں شہری ہوابازی کے وزیر کے رام موہن نائیڈو سے ملاقات کی اور ورنگل اورعادل آباد ہوائی اڈوں کو 2 جون 2028 تک مکمل کرنے کے لیے تعاون طلب کیا۔ انہوں نے کہا کہ مرکزی وزیر ان دو ہوائی اڈوں کی تعمیر کے لئے اپنا تعاون بڑھا رہے ہیں۔وزیر اعلیٰ نے کہا کہ ہم نے ان دو ہوائی اڈوں پر کام مکمل کرنے اور 2 جون 2028 تک ان کا افتتاح کرنے کا ہدف مقرر کیا ہے۔
ایئرپورٹ مزید ترقی کیلئے ضروری
انہوں نے نوٹ کیا کہ تلنگانہ، ملک کی آبادی کا 2.50 فیصد ہے، اور قومی جی ڈی پی میں 5 فیصد تلنگانہ کا حصہ ہے۔ وزیراعلیٰ نے کہا کہ بین الاقوامی معیار پر پورا اترنے والے ہوائی اڈے ریاست کی مزید ترقی کے لیے ضروری ہیں۔انہوں نے کہا کہ ورنگل ایرپورٹ کے ڈیزائن میں کاکتیہ ثقافت کو اہمیت دی جائے گی۔
مرکزی وزیرسے نمائندگی
انہوں نے کہا۔"ہم مرکزی حکومت سے تعاون حاصل کرنے کے لیے ضروری بات چیت کر رہے ہیں۔ مرکزی اور ریاستی حکومتوں کے درمیان تعاون کا جذبہ جاری رہے گا، جس کا بنیادی مقصد ترقی ہے،" ۔
تین ہفتوں میں ایئرپورٹ کا کام شروع ہو گا
رام موہن نائیڈو نے میڈیا والوں کو بتایا کہ ریونت ریڈی نے واضح طور پر کہا کہ ورنگل ایرپورٹ 2 جون 2028 تک مکمل ہوجائے گا جو تلنگانہ کا یوم تاسیس ہے۔ انہوں نے کہا کہ اگر ضرورت پڑی تو ہدف کے حصول کے لیے اضافی کوششیں کی جائیں گی۔انہوں نے اعلان کیا کہ ایئرپورٹ پر کام تین ہفتوں میں شروع ہو جائے گا۔
ہوائی اڈو کے ڈیزائن اوردیگرسہولیات پر تبادلہ خیال
وزیراعلیٰ کے دفتر کے مطابق، دونوں رہنماؤں نے آنے والے دونوں ہوائی اڈوں پر ڈیزائن اور مجوزہ سہولیات پر تبادلہ خیال کیا۔رام موہن نائیڈو نے اپریل میں کہا تھا کہ ورنگل کے ممنور ہوائی اڈے کا تین ماہ میں سنگ بنیاد رکھا جائے گا۔ ریاستی حکومت نے ہوائی اڈے کی تعمیر کے لیے پہلے ہی زمین الاٹ کر دی ہے۔
عادل آباد میں دفاع کے لیے ایک ہوائی اڈہ
وزیر دفاع راج ناتھ سنگھ، رام موہن نائیڈو، اور مرکزی وزیر کوئلہ اور کان کنی جی کشن ریڈی کے ساتھ میٹنگ کے بعد، انہوں نے اعلان کیا کہ عادل آباد میں دفاع کے لیے ایک ہوائی اڈہ بنایا جائے گا، جس میں سول آپریشنز کے لیے ایک انکلیو ہوگا۔جہاں دفاع کے پاس عادل آباد میں پہلے سے ہی 360 ایکڑ اراضی کے ساتھ ایک ہوائی پٹی ہے، شہری ہوا بازی کی وزارت نے ریاستی حکومت سے کہا کہ وہ ہوائی اڈے کی تعمیر کے لیے مزید 450 ایکڑ اراضی حاصل کرے۔مجوزہ ہوائی اڈہ ایک بڑی سہولت ہو گی جس میں رن وے ایئربس اے 320 طیاروں کو سنبھالنے کے قابل ہو گا۔
