اتر پردیش کے ضلع سنبھل میں واقع تاریخی شاہی جامع مسجد کے حوالے سے بھارتی آثارِ قدیمہ (ASI) کی ایک حالیہ رپورٹ نے اہم انکشافات کیے ہیں۔ اے ایس آئی نے واضح کیا ہے کہ اس کے ریکارڈ میں ایسی کوئی معلومات موجود نہیں ہیں جو یہ ثابت کریں کہ یہ مسجد کسی قدیم ڈھانچے یا مندر کو گرا کر بنائی گئی تھی،یا خالی زمین پر۔محکمہ کے پاس اس بارے میں بھی معلومات نہیں ہیں کہ مسجد کی تعمیر کے وقت زمین کس کے پاس تھی۔
آر ٹی آئی (RTI) میں پوچھے گئے سوالات اور اے ایس آئی کا جواب:
یہ انکشاف حقِ معلومات (RTI) کے تحت ستیہ پرکاش یادو نامی ایک شہری کی جانب سے مانگی گئی معلومات کے جواب میں سامنے آیا ہے۔ درخواست گزار نے مسجد کی تاریخ، زمین کی ملکیت اور قدیم ڈھانچے کے حوالے سے کئی سوالات پوچھے تھے۔انہوں نے زمین کے مالک کا نام اور ملکیت سے متعلق دستاویزات کی درخواست بھی کی۔ جواب میں آرکیالوجیکل سروے آف انڈیا نے کہا کہ اس دفتر میں ایسی کوئی معلومات موجود نہیں ہے۔
درخواست میں یہ بھی پوچھا گیا کہ جب اس جگہ کو محفوظ یادگار قرار دیا گیا تو اس جگہ پر کس قسم کے ڈھانچے موجود تھے، کیا اس کے بعد وہاں کوئی نئی تعمیر ہوئی اور مسجد سے متعلق ماضی کے تنازعات کی تاریخ کیا ہے۔ ان سوالات کے جواب میں اے ایس آئی نے کہا کہ اس کے ریکارڈ میں ایسی معلومات دستیاب نہیں ہیں۔
تاہم، پہلی اپیل کی سماعت کے دوران، اے ایس آئی نے 2018 کے ایک واقعے کا حوالہ دیا۔ محکمہ نے وضاحت کی کہ کسی بھی مرکزی طور پر محفوظ یادگار کے محفوظ علاقے میں نئی تعمیر کی اجازت نہیں ہے۔ اے ایس آئی نے بتایا کہ 2018 میں، جامع مسجد کمپلیکس میں ایک "غیر قانونی" اسٹیل ریلنگ تعمیر کی جا رہی تھی، جس سے محکمے کو روکنے کا حکم جاری کرنا پڑا۔
آر ٹی آئی درخواست گزار نے مسجد کی تعمیر کی مدت کے بارے میں بھی جانکاری مانگی۔ اپنے ریکارڈ کا حوالہ دیتے ہوئے اے ایس آئی نے بتایا کہ "جامع مسجد سنبھل 1526 میں تعمیر کی گئی تھی۔" محکمہ نے اس کی تائید کے لیے متعلقہ شواہد کا حوالہ دیا۔ مزید برآں، یہ پوچھا گیا کہ کیا اس ڈھانچے کو پہلے کسی اور نام سے جانا جاتا تھا۔ اے ایس آئی نے بتایا کہ مسجد اس نام سے محفوظ ہے، یعنی اسے پہلے جامع مسجد کے نام سے جانا جاتا تھا۔
ڈھانچے کی موجودہ نوعیت کے بارے میں پوچھے جانے پر اے ایس آئی نے کہا، "یہ فی الحال ایک مسجد کے طور پر موجود ہے۔" محکمہ نے یہ بھی کہا کہ جامع مسجد کو 1920 میں ایک گزٹ نوٹیفکیشن کے ذریعے آرکیالوجیکل سروے آف انڈیا کے تحفظ میں لے لیا گیا تھا۔ سنٹرل انفارمیشن کمیشن کے سامنے سماعت کے دوران، اپیل کنندہ نے دلیل دی کہ اہم معلومات کو "دستیاب نہیں" کا دعوی کرتے ہوئے غلط طریقے سے روک دیا گیا تھا۔ تاہم، اے ایس آئی نے کہا کہ اس نے اپنے ریکارڈ میں دستیاب تمام معلومات فراہم کر دی ہیں اور جو معلومات دستیاب نہیں تھیں اسے تیار کرنے یا جمع کرنے پر مجبور نہیں کیا جا سکتا۔
کمیشن نے اے ایس آئی کے موقف کو برقرار رکھتے ہوئے کہا کہ حق اطلاعات قانون کے تحت عوامی حکام صرف وہی معلومات فراہم کرنے کے پابند ہیں جو ریکارڈ پر موجود ہیں۔ کمیشن نے عدالتی نظیروں کا حوالہ دیتے ہوئے کہا کہ عوامی اتھارٹی کو ایسی معلومات فراہم کرنے کی ہدایت نہیں کی جا سکتی جو اس کے پاس دستیاب نہیں ہے۔
 (4)f0d79bdd-253c-4ea3-9503-47c43ee7294c33202613640.jpg)
