سعودی عرب کے شہر مدینہ منورہ کے قریب دردناک سڑک حادثہ پیش آیا ہے،جس میں42 ہندوستانی عمرہ زائرین کی موت ہو گئی ہے۔حادثہ اس وقت پیش آیا جب زائرین مکہ مکرمہ سے مدینہ کی طرف واپس جارہے تھے۔اس دوران ہندوستانی زائرین کی بس ڈیزل ٹینکر سے ٹکرا گئی جس کے نتیجے میں بس میں آگ بھڑک اُٹھی اور 42 افراد موقع پر ہی جاں بحق ہوگئے۔ یہ المناک واقعہ پیر کی صبح تقریباً 1 بجکر 30 منٹ پر مدینہ روڈ کے مفرحت علاقہ میں پیش آیا۔معلومات کے مطابق بس میں 43 مسافر سوار تھے۔ حادثے میں صرف ایک شخص زندہ بچ سکا۔ واحد زندہ بچ جانے والے کو اسپتال میں داخل کرایا گیا ہے۔
جاں بحق ہونے والوں میں 20 خواتین اور 11 بچے بھی شامل ہیں ۔ ابتدائی معلومات کے مطابق مرنے والوں میں بیشتر کا تعلق حیدرآباد سے ہے۔مقامی میڈیا نے 42 ہلاکتوں کی تصدیق کی ہے تاہم سعودی حکام کی جانب سے ہلاک یا زخمی افراد کی تعداد کے بارے میں باضابطہ اعلان کا انتظار ہے۔
سعودی حکام نے ابھی تک ہلاکتوں کی صحیح تعداد کی تصدیق نہیں کی ہے۔ اطلاعات کے مطابق ہنگامی ٹیمیں امدادی کارروائیوں میں مصروف ہیں۔ حادثے کے بعد مقامی انتظامیہ ہائی الرٹ ہے۔ ہندوستانی سفارت خانہ بھی معلومات اکٹھا کر رہا ہے۔وزارت حج و عمرہ اور ٹریول ایجنسی نے حادثے کی تصدیق کی ہے۔ تاہم ابھی تک ہلاکتوں کی تعداد اور حادثے کی تصدیق شدہ وجہ معلوم نہیں ہو سکی ہے۔ حکام حادثے کی وجوہات کی تحقیقات کر رہے ہیں۔ فی الحال، مختلف غیر مصدقہ نظریات سامنے آ رہے ہیں، بشمول ڈرائیور کا سو جانا۔
چیف منسٹر ریونت ریڈی نے خصوصی احکامات جاری کئے:
تلنگانہ کے چیف منسٹر ریونت ریڈی نے اس واقعہ پر افسوس کا اظہار کیا اور چیف سکریٹری اور ڈائرکٹر جنرل آف پولیس کو تمام معلومات اکٹھی کرنے کا حکم دیا۔ انہوں نے انہیں مشورہ دیا ہے کہ وہ مرکزی دفتر خارجہ اور سعودی سفارت خانے کے اہلکاروں سے بات کریں۔چیف سکریٹری نے دہلی میں مقیم ریزیڈنٹ کمشنر گورو اپل کو متنبہ کیا ہے کہ وہ حیدرآباد سمیت تلنگانہ کے کئی اضلاع سے عمرہ زائرین کو کسی بھی ممکنہ خطرے کے بارے میں معلومات اکٹھا کریں۔ واقعے سے متعلق مزید معلومات کا انتظار ہے۔
