کانگریس کی سینئر رہنما اور پارلیمانی پارٹی کی صدر سونیا گاندھی کو دہلی کے سر گنگا رام اسپتال میں داخل کرایا گیا ہے۔ میڈیا رپورٹ کے مطابق منگل کی صبح ان کی طبیعت خراب ہونے پر انہیں اسپتال لے جایا گیا۔ سونیا گاندھی کی طبیعت کچھ عرصے سے خراب تھی جس کی وجہ سے انہیں داخل کرایا گیا تھا۔ ہسپتال میں ڈاکٹروں کی ایک ٹیم ان کی نگرانی کر رہے ہیں۔ ذرائع نے بتایا کہ وہ سینے کے ماہر کی نگرانی میں ہیں۔ تاہم سونیا گاندھی کی صحت کو لے کر کانگریس پارٹی یا اسپتال کی طرف سے ابھی تک کوئی بیان جاری نہیں کیا گیا ہے۔
دہلی کی آلودگی کا سونیا گاندھی کی صحت پراثر
سونیا گاندھی 9 دسمبر 2025 کو 79 برس کی ہو چکی ہیں۔ وہ کافی عرصے سے کھانسی کے مسئلے سے دوچار ہیں، جس کی وجہ سے انہیں وقتاً فوقتاً طبی معائنے کے لیے آنا پڑتا ہے۔ خاص طور پر دہلی میں بڑھتی ہوئی فضائی آلودگی کے باعث ان کی تکالیف میں اضافہ ہو جاتا ہے۔
صحت کے مسائل سے جدوجہد
سونیا گاندھی گزشتہ کئی برسوں سے مختلف صحت سے متعلق مسائل کا سامنا کر رہی ہیں۔ وہ باقاعدگی سے جانچ اور علاج کے لیے اسپتال جاتی رہی ہیں۔ فی الحال وہ ڈاکٹروں کی نگرانی میں ہیں اور ان کی صحت میں بہتری آنے کے بعد ہی مزید معلومات سامنے آ سکیں گی۔ صورتحال پر مکمل نظر رکھی جا رہی ہے۔
شملہ میں تعطیلات کے دوران طبیعت خراب ہوئی تھی
اس سے قبل 15 جون 2025 کو پیٹ میں تکلیف کے باعث سونیا گاندھی کو سر گنگا رام اسپتال کے سرجیکل گیسٹرواینٹرولوجی شعبے میں داخل کرایا گیا تھا، جہاں وہ 3 سے 4 دن تک زیرِ علاج رہیں۔ اس کے علاوہ 7 جون کو بھی ان کی طبیعت اچانک خراب ہو گئی تھی۔ اس وقت وہ پرینکا گاندھی کے ساتھ شملہ میں واقع اپنے گھر پر تعطیلات گزارنے گئی تھیں، لیکن طبیعت بگڑنے کے باعث اگلے ہی دن دہلی واپس آنا پڑا۔ 9 جون کو انہوں نے سر گنگا رام اسپتال میں طبی معائنہ کرایا تھا۔
