حیدرآباد میں مولانا آزاد نیشنل اردو یونیورسٹی (MANUU) میں ہاسٹل الاٹمنٹ کے معاملے پر ایک بار پھر طلبہ کا احتجاج سامنے آیا ہے۔ نئی داخلہ لینے والی طالبات نے گرلز ہاسٹل کے باہر دھرنا دیتے ہوئے مطالبہ کیا ہے کہ جب تک باضابطہ ہاسٹل الاٹمنٹ نہیں ہو جاتا، انہیں فوری طور پر عارضی رہائش اور میس کی سہولت فراہم کی جائے۔
احتجاج کرنے والی طالبات کا کہنا ہے کہ وہ 100 فیصد ہاسٹل سہولت کی امید کے ساتھ یونیورسٹی میں داخلہ لینے آئی تھیں، لیکن کلاسوں کے آغاز کے باوجود انہیں رہائش فراہم نہیں کی گئی۔ ان کے مطابق، محفوظ رہائش کے بغیر تعلیم جاری رکھنا انتہائی مشکل ہو جاتا ہے، خاص طور پر ان طالبات کے لیے جو دوسرے شہروں اور ریاستوں سے یہاں آئی ہیں۔
طالبات نے انتظامیہ کے رویے پر بھی ناراضی کا اظہار کیا ہے۔ ان کا کہنا ہے کہ کئی مرتبہ توجہ دلانے کے باوجود مسئلے کا کوئی مؤثر حل پیش نہیں کیا گیا، جبکہ بعض طالبات بیماری اور دیگر مشکلات کے باوجود بنیادی حق کے لیے احتجاج کرنے پر مجبور ہیں۔ احتجاج میں شریک طلبہ کا کہنا ہے کہ جب تک تمام ضرورت مند طالبات کو ہاسٹل فراہم نہیں کیا جاتا، ان کا احتجاج جاری رہے گا۔
طلبہ کے مطابق MANUU میں ہاسٹل کی کمی کا مسئلہ گزشتہ چار سے پانچ برسوں سے مسلسل برقرار ہے۔ ہر تعلیمی سال کے آغاز پر بڑی تعداد میں طلبہ کو رہائش کے مسائل کا سامنا کرنا پڑتا ہے، لیکن اب تک اس کا کوئی مستقل حل سامنے نہیں آ سکا۔
احتجاج کرنے والی طالبات کا کہنا ہے کہ محفوظ رہائش ہر طالب علم کی بنیادی ضرورت ہے اور اس کے بغیر تعلیمی سرگرمیوں پر براہ راست اثر پڑتا ہے۔ انہوں نے مطالبہ کیا کہ کسی بھی طالب علم کو مجبوری میں کیمپس سے باہر غیر محفوظ یا مہنگی رہائش اختیار کرنے پر مجبور نہ کیا جائے۔
طلبہ اور مختلف سماجی حلقوں نے بھی یونیورسٹی انتظامیہ سے اپیل کی ہے کہ وہ طالبات کے نمائندوں سے فوری بات چیت کرے، ان کے تحفظات کو سنجیدگی سے سنے اور ہاسٹل بحران کے حل کے لیے فوری اور عملی اقدامات کرے، تاکہ طالبات بلا رکاوٹ اپنی تعلیم جاری رکھ سکیں۔
