حیدرآباد اپنے عالمی پروفائل کو مضبوط کرنے کے لیے تیار ہے کیونکہ یونیورسٹی آف کیمبرج اور لیورپول ایف سی تلنگانہ کے ساتھ تعلیم، تحقیق، ٹکنالوجی، کھیل اور اختراع میں اسٹریٹجک پارٹنرشپ تلاش کر رہے ہیں۔یہ پیش رفت چیف منسٹر اے ریونت ریڈی کی لندن میں دونوں اداروں کے نمائندوں کے ساتھ ملاقاتوں کے دوران سامنے آئی۔ تلنگانہ کی نمائندگی کرنے والے ایک وفد نے کیمبرج یونیورسٹی کے ماہرین تعلیم کے ایک گروپ کے ساتھ ایک نتیجہ خیز میٹنگ کی۔ تلنگانہ کے چیف منسٹر اے ریونت ریڈی کی قیادت میں وفد نے کیمبرج کے نمائندوں کے ساتھ تعلیم اور تحقیق کے شعبوں میں شراکت کے مواقع کے بارے میں وسیع بات چیت کی۔
میٹنگ میں وزیر اعلیٰ ریونت ریڈی کے ساتھ ڈی سریدھر بابو (وزیر برائے آئی ٹی اور صنعت)، کے رام کرشن راؤ (وزیر اعلیٰ کے مشیر اور سابق اسپیشل چیف سکریٹری) اور جیش رنجن (خصوصی چیف سکریٹری) تھے۔وفد نے حیدرآباد میں دنیا کے اعلیٰ تعلیمی اداروں کے لیے دستیاب مواقع پر روشنی ڈالی اور کیمبرج کے نمائندوں کو دعوت دی کہ وہ حیدرآباد کو عالمی علمی مرکز میں تبدیل کرنے کے تلنگانہ حکومت کے مشن میں شراکت کریں۔
کیمبرج جج بزنس اسکول میں مارکیٹنگ چیئر کے پروفیسر جیدیپ پربھو (حکومت ہند کے تعاون سے) اور اسی ادارے میں 'فروگل اے آئی' کے پروفیسر اور شریک چیئر وینکٹا سریش گنڈی کوٹا نے تلنگانہ کے ساتھ تعاون کرنے میں دلچسپی ظاہر کی۔ انہوں نے ریاست میں موجود مواقع کا بہت مثبت جواب دیا۔
دونوں فریقوں نے شراکت داری کے لیے ایک واضح ایکشن پلان تشکیل دینے پر اتفاق کیا جس میں حیدرآباد میں تعلیمی پروگراموں کا انعقاد، مشترکہ تحقیق کرنا، اور نوجوان کاروباریوں کے لیے انکیوبیشن اور اسٹارٹ اپ کی ترقی میں معاونت شامل ہے۔یہ بات چیت تلنگانہ اور عالمی شہرت یافتہ یونیورسٹی آف کیمبرج کے درمیان شراکت داری کی راہ ہموار کرنے کے لیے تیار ہے۔ یہ میٹنگ حیدرآباد کو تعلیم، تحقیق اور اختراع کے ایک بین الاقوامی مرکز میں تبدیل کرنے کے ’تلنگانہ رائزنگ‘ مقصد کو مزید تقویت دے گی۔
لیورپول کا وفد کرے گا حیدرآباد کا دورہ
تلنگانہ کےوفد نے لیورپول، یو کے، اور تلنگانہ، انڈیا کے درمیان ابھرتی ہوئی اسٹریٹجک شراکت داری پر بات چیت کی ، جس میں لائف سائنسز، ٹیکنالوجی، کھیل اور تخلیقی معیشت پر توجہ مرکوز کی گئی ہے، جس کی بنیاد لندن میں تلنگانہ کے سی ایم اے ریونت ریڈی اور لیورپول سٹی ڈیولپمنٹ حکام کے علاوہ لیورپول FC کے نمائندوں کے درمیان ہوئی تھی۔اس میٹنگ میں لیورپول سٹی کونسل سے سوسن فنیگن اور نوالا گالاگھراور دیگر موجود تھے۔ بتایا جا رہا ہےکہ لیورپول کا ایک وفد اکتوبر میں حیدرآباد کا دورہ کرے گا تاکہ تعلقات کو باضابطہ شکل دے سکے، جس کا مقصد تلنگانہ رائزنگ اقدام کے تحت سرمایہ کاری اور تعاون کو فروغ دینا ہے۔
آکسفورڈ یونیورسٹی کا کیا گیا دورہ
تلنگانہ وزیراعلیٰ اے۔ ریونت ریڈی نے ایک دن پہلے عالمی شہرت یافتہ آکسفورڈ یونیورسٹی کو تلنگانہ میں بڑے پیمانے پر تعلیمی پروگرام شروع کرنے کی دعوت دی ہے۔ "تلنگانہ رائزنگ" نمائندہ وفد کے ایک حصے کے طور پر وزیراعلیٰ اے۔ ریونت ریڈی نے جمعہ کو تقریباً 900 سالہ تاریخ رکھنے والی دنیا کی معروف آکسفورڈ یونیورسٹی کا دورہ کیا۔وزیراعلیٰ نے تلنگانہ اور آکسفورڈ یونیورسٹی کے درمیان شراکت داری کے امکانات، ریاست کے نوجوانوں کو عالمی معیار کی تعلیم اور تحقیق کے مواقع فراہم کرنے سمیت مختلف امور پر ممتاز ماہرینِ تعلیم کے ساتھ تفصیلی تبادلہ خیال کیا۔
وزیراعلیٰ نے آکسفورڈ یونیورسٹی کے بلَاوَٹنِک اسکول آف گورنمنٹ کی پروفیسر مایا ٹیوڈر اور بیلیول کالج کے پروفیسر فیصل دیوجی سے ملاقات کی۔ اس موقع پر انہوں نے انہیں "تلنگانہ رائزنگ" ویژن کے بارے میں تفصیلی طور پر واقف کرایا۔ انہوں نے حیدرآباد کو عالمی معیار کا تعلیمی مرکز بنانے کے لیے تلنگانہ حکومت کی جانب سے تیار کیے جانے والے منصوبوں اور اٹھائے جانے والے اقدامات کی بھی وضاحت کی۔
وزیراعلیٰ نے آکسفورڈ یونیورسٹی کو دعوت دی کہ وہ اپنے ایگزیکٹو ایجوکیشن پروگراموں، خصوصی تحقیقی صلاحیتوں اور وسیع تعلیمی نظام کو حیدرآباد تک وسعت دے۔ انہوں نے یونیورسٹی سے حیدرآباد میں ایک مرکز قائم کرتے ہوئے تلنگانہ کے نوجوانوں اور پیشہ ور افراد کو عالمی معیار کی تعلیم اور تحقیق کے مواقع فراہم کرنے کے لیے آگے آنے کی اپیل کی۔
اس اہم ملاقات میں وزیراعلیٰ کے دفتر کے مشیر اور ایکس آفیشیو خصوصی چیف سکریٹری کے۔ رام کرشنا راؤ نے بھی شرکت کی۔ انہوں نے مرکزی حکومت کی قومی تعلیمی پالیسی کے تحت بیرونی ممالک کی یونیورسٹیوں کے لیے دستیاب مواقع پر تفصیلی پریزنٹیشن پیش کی۔ انہوں نے حیدرآباد اور تلنگانہ میں غیر ملکی یونیورسٹیوں کے قیام کے امکانات اور انہیں حاصل ہونے والے فوائد سے بھی واقف کرایا۔
