 (4)d95f3a7a-34b8-4df4-8e2d-adcb946740f7253202610127.jpg)
امریکی صدر ٹرمپ نے ایران کے ساتھ جاری کشیدگی کو کم کرنے کے لیے پندرہ نکاتی جنگ بندی منصوبہ پیش کر دیا ہے، جسے خطے میں امن کی جانب ایک اہم پیش رفت قرار دیا جا رہا ہے۔ امریکی انتظامیہ کے ایک اعلیٰ عہدیدار کے مطابق یہ منصوبہ پاکستان کی ثالثی کے ذریعے ایران تک پہنچایا گیا ہے۔ ذرائع کا کہنا ہے کہ پاکستان نے نہ صرف اس منصوبے کی ترسیل میں کردار ادا کیا بلکہ امریکہ اور ایران کے درمیان براہ راست مذاکرات کروانے کی پیشکش بھی کی ہے۔
رپورٹس کے مطابق یہ پیشکش ایسے وقت سامنے آئی ہے جب امریکہ، مشرقِ وسطیٰ میں اپنی فوجی موجودگی مزید بڑھانے کی تیاری کر رہا ہے، جس سے خطے میں کشیدگی کے خدشات بھی بڑھ رہے ہیں۔ دوسری جانب انڈیا میں اسرائیل کے سفیر نے اس پیش رفت پر ردعمل دیتے ہوئے کہا ہے کہ اسرائیل کو امریکی جنگ بندی منصوبے سے امید وابستہ ہے۔ ان کے مطابق ایران اب مذاکرات پر آمادہ نظر آ رہا ہے، جو اس بات کا اشارہ ہے کہ اس پر بین الاقوامی دباؤ میں اضافہ ہو رہا ہے۔
ادھر اوول آفس میں میڈیا سے گفتگو کرتے ہوئے صدر ٹرمپ نے دعویٰ کیا کہ ایران نے جوہری ہتھیار نہ بنانے پر اتفاق کیا ہے اور آبنائے ہرمز سے متعلق امریکہ کو ایک اہم پیشکش بھی دی ہے، تاہم اس کی تفصیلات ظاہر نہیں کی گئیں۔ صدر ٹرمپ کے مطابق تین ہفتوں تک جاری رہنے والی جنگ کے بعد صورتحال میں نمایاں بہتری آئی ہے اور ایران اب معاہدہ کرنے کے لیے تیار ہے۔ انہوں نے یہ بھی دعویٰ کیا کہ امریکہ نے ایران کی جوہری صلاحیت کو مکمل طور پر تباہ کر دیا ہے اور جنگ میں کامیابی حاصل کی ہے۔
اس سے قبل صدر ٹرمپ نے شہباز شریف کی اس سوشل میڈیا پوسٹ کی بھی توثیق کی تھی، جس میں ایران اور امریکہ کے درمیان مذاکرات میں پاکستان کے ممکنہ کردار کا ذکر کیا گیا تھا۔ تجزیہ کاروں کے مطابق اگر یہ منصوبہ کامیاب ہوتا ہے تو یہ نہ صرف خطے میں کشیدگی کم کرنے میں مددگار ثابت ہوگا بلکہ عالمی سطح پر توانائی کی ترسیل اور امن و استحکام کے لیے بھی اہم پیش رفت ہوگی۔
7e3c91f3-7dd4-4131-9062-4a0f280b03182532026103047.jpg)
