امریکی فوجی ٹرانسپورٹ طیارہ تقریباً 119 ہندوستانی شہریوں کو لے کر 16 فروری کو امرتسر انٹر نیشنل ہوائی اڈے پر اترے گا۔ ڈونلڈ ٹرمپ کے گزشتہ ماہ امریکی صدر کے طور پر حلف اٹھانے کے بعد یہ دوسرا موقع ہوگا جب ہندوستانیوں کو ملک بدر کیا جائے گا۔اس سے قبل ایک امریکی فوجی طیارہ نے 104 'غیر قانونی تارکین وطن' کو لے کر امرتسر پہنچا تھا۔ ٹرمپ انتظامیہ نے غیر قانونی تارکین وطن کے خلاف کارروائی کے تحت ان لوگوں کو ہندوستان ڈی پورٹ کیا تھا۔ دریں اثنا، پنجاب کے وزیر اعلی بھگونت مان نے جمعہ کو امرتسر ہوائی اڈے پر "غیر قانونی" ہندوستانی تارکین وطن کو لے کر آنے والی ایک اور پرواز کے امکان پر سوال اٹھایا اور مرکزی حکومت پر پنجاب کو بدنام کرنے کا الزام لگایا۔
امریکہ میں سرکاری ذرائع کے مطابق ملک بدری کا عمل اس وقت تک جاری رہے گا جب تک تمام 'غیر قانونی تارکین وطن' کو ان کے ملک واپس نہیں بھیجا جاتا۔ ذرائع کے مطابق ڈی پورٹ کیے گئے افراد میں پنجاب سے 67، ہریانہ سے 33، گجرات سے 8، اتر پردیش سے 3، راجستھان اور مہاراشٹر کے دو دو اور جموں و کشمیر اور ہماچل پردیش سے ایک ایک شامل ہے۔ یہ عمل ایک ایسے وقت میں کیا جا رہا ہے جب وزیر اعظم نریندر مودی نے اپنے دورہ امریکہ کے دوران امریکی صدر ڈونالڈ ٹرمپ سے ملاقات کی اور امیگریشن سمیت کئی اہم دو طرفہ امور پر تبادلہ خیال کیا۔
ایک مشترکہ پریس کانفرنس کے دوران، مودی نے تصدیق شدہ ہندوستانی شہریوں کی وطن واپسی میں مدد کے لیے ہندوستان کے عزم کا اعادہ کیا لیکن ساتھ ہی ساتھ تارکین وطن کا استحصال کرنے والے انسانی اسمگلنگ کے نیٹ ورکس سے نمٹنے کی ضرورت پر بھی زور دیا۔ ٹرمپ انتظامیہ نے بھارتیوں کو فوجی طیارے میں ہتھکڑیوں اور بیڑیوں میں ڈال کر ان کے ملک واپس بھیج دیا تھا جس پر بھارت میں غم و غصہ پایا جاتا ہے۔تاہم یو ایس امیگریشن اور کسٹمز انفورسمنٹ نے اس عمل کا دفاع کرتے ہوئے کہا ہے کہ یہ ایک معیاری حفاظتی پروٹوکول ہے ۔جو ڈی پورٹیوں کو لے جانے والی پروازوں پر استعمال کیا جاتا ہے تاکہ لوگوں کو فرار ہونے کی کوشش کرنے یا رکاوٹیں پیدا کرنے سے روکا جا سکے۔
