انڈین پریمیئر لیگ (آئی پی ایل) 2026 میں راجستھان رائلز (RR) کے اوپننگ بلے باز ویبھو سوریاونشی نے اپنی طوفانی بلے بازی سے کرکٹ کی دنیا میں تہلکہ مچا دیا ہے۔ اس سیزن کے اہم ایلیمینیٹر میچ میں سوریاونشی نے ناقابلِ یقین کارکردگی کا مظاہرہ کرتے ہوئے صرف 16 گیندوں پر اپنی نصف سنچری مکمل کی اور آئی پی ایل کے پلے آف میچوں میں تیز ترین ففٹی بنانے کا مشترکہ ریکارڈ اپنے نام کر لیا۔ آئیے جانتے ہیں پلے آف کی تاریخ میں سب سے تیز نصف سنچریاں بنانے والے مایہ ناز بلے بازوں کے بارے میں۔
سریش راینا:
آئی پی ایل 2014 کے کوالیفائر-2 میچ میں چنئی سپر کنگز (CSK) کے اسٹار بلے باز سریش راینا نے پنجاب کنگز کے خلاف محض 16 گیندوں پر طوفانی نصف سنچری داغ دی تھی۔ پنجاب نے پہلے کھیلتے ہوئے 226 رنوں کا بڑا ہدف دیا تھا۔ جواب میں رینا نے صرف 25 گیندوں پر 348 کے ناقابلِ یقین اسٹرائیک ریٹ سے 87 رن بنائے، لیکن وہ بدقسمتی سے رن آؤٹ ہو گئے اور چنئی یہ میچ ہار گئی۔
ویبھو سوریاونشی :
راجستھان رائلز کے نوجوان اوپنر ویبھو سوریاونشی نے سن رائزرز حیدرآباد (SRH) کے خلاف ایلیمینیٹر میچ میں صرف 16 گیندوں پر نصف سنچری مکمل کر کے سریش رینا کا 12 سال پرانا ریکارڈ برابر کر دیا۔ سوریاونشی نے مجموعی طور پر 29 گیندوں پر 5 چوکوں اور 12 چھکوں کی مدد سے 97 رنوں کی اننگز کھیلی۔ اگرچہ وہ آئی پی ایل پلے آف کی تیز ترین سنچری بنانے سے محروم رہے، لیکن انہوں نے ایک سیزن میں سب سے زیادہ چھکے لگانے کا کرس گیل (59 چھکے) کا تاریخی ریکارڈ ضرور توڑ دیا۔
ایڈم گلکرسٹ :
آئی پی ایل 2009 کے پہلے سیمی فائنل میں دکن چارجرز(DCH) کے کپتان اور لیجنڈری وکٹ کیپر بلے باز ایڈم گلکرسٹ نے دہلی کیپٹلز کے خلاف جنوبی افریقہ کے شہر سینچورین میں تباہ کن بلے بازی کی تھی۔ گلکرسٹ نے صرف 17 گیندوں پر نصف سنچری بنائی اور 35 گیندوں پر 85 رنوں کی اننگز کھیل کر اپنی ٹیم کو 154 رنوں کا ہدف آسانی سے حاصل کروایا۔
مہیندر سنگھ دھونی :
چنئی سپر کنگز کے سابق کپتان ایم ایس دھونی بھی اس فہرست میں شامل ہیں۔ آئی پی ایل 2012 کے ایلیمینیٹر میچ میں ممبئی انڈینز (MI) کے خلاف دھونی نے دھواں دھار بلے بازی کرتے ہوئے صرف 20 گیندوں پر پلے آف کی چوتھی تیز ترین نصف سنچری بنائی تھی۔ انہوں نے 255 کے اسٹرائیک ریٹ سے 6 چوکوں اور 2 چھکوں کی مدد سے ناٹ آؤٹ 51 رن بنائے تھے، جس کی بدولت چنئی نے یہ میچ 38 رنوں سے جیتا تھا۔
