ایران میں ملک گیر احتجاجی مظاہروں پر کاروائی کے بعد حکومت نے پہلی بار سرکاری طور پر اموات کا اعداد و شمار جاری کیا ہے۔ بدھ کو ایرانی سرکاری میڈیا نے وزارت داخلہ اور شہدا ءو سابق فوجیوں کے فاونڈیشن کا حوالہ دیتے ہوئے بتایا کہ 3,117 افراد ہلاک ہوئے ہیں۔ حکومت کے مطابق اس اعداد و شمار میں 2,427 شہری اور سیکیورٹی اہلکار شامل ہیں، جبکہ باقی افراد کے بارے میں کوئی واضح تفصیل نہیں دی گئی۔
تاہم، غیر ملکی انسانی حقوق کی تنظیموں نے حکومت کے اعداد و شمار پر سوال اٹھائے ہیں۔ امریکہ میں قائم ہیومن رائٹس ایکٹوسٹ نیوز ایجنسی (HRANA) کے مطابق جمعرات کی صبح تک ہلاکتوں کی تعداد کم از کم 4,902 ہو چکی تھی اور یہ تعداد مزید بڑھ سکتی ہے۔ یہ تنظیم ایران کے اندر کام کرنے والے کارکنوں کے نیٹ ورک کے ذریعے معلومات کی تصدیق کرتی ہے اور اس کے اعداد و شمار ماضی میں بھی کافی حد تک درست ثابت ہوئے ہیں۔ دیگر انسانی حقوق کے گروپس نے بھی سرکاری اعداد و شمار سے کہیں زیادہ اموات کا دعویٰ کیا ہے۔
ایسوسی ایٹڈ پریس ان اعداد و شمار کی آزادانہ تصدیق نہیں کر سکا۔ اس کی بنیادی وجہ یہ ہے کہ ایرانی حکام نے انٹرنیٹ سروسز بند کر دی ہیں، بین الاقوامی کالوں پر پابندی لگا دی ہے، اور مقامی صحافیوں کی رپورٹنگ پر پابندیاں عائد کر دی ہیں۔ سرکاری ٹی وی نے مسلسل مظاہرین کو "دنگائی" قرار دیا ہے اور ان پر امریکہ اور اسرائیل سے متاثر ہونے کا الزام لگایا ہے، حالانکہ اس کے لیے کوئی ثبوت پیش نہیں کیا گیا۔
ایران کے وزیر خارجہ نے امریکہ کو دوبارہ دھمکی دی
اس دوران، ایران کے وزیر خارجہ عباس عراقچی نے امریکہ کو اب تک کی سب سے براہ راست تنبیہ کی ہے۔ انہوں نے کہا کہ اگر ایران پر دوبارہ حملہ کیا گیا تو اسلامی جمہوریہ "پوری طاقت سے جواب دے گی۔" یہ بیان ایسے وقت میں آیا جب ہلاکتوں کی وجہ سے ڈاوس میں ورلڈ اکنامک فورم میں ان کا دعوت نامہ منسوخ کر دیا گیا ہے اور ایک امریکی طیارہ بردار بحری جہاز ایشیا سے مغرب کی طرف مشرق وسطیٰ کی جانب بڑھ رہا ہے۔
کتنی گرفتاریاں ہوئیں؟
انسانی حقوق کی تنظیموں کے مطابق، احتجاجی مظاہروں کے دوران تقریباً 26,500 افراد کو گرفتار کیا گیا ہے۔ حکام کے بیانات سے یہ خدشہ پیدا ہوا ہے کہ کچھ قیدیوں کو سزائے موت سنائی جا سکتی ہے۔ امریکی صدر ڈونلڈ ٹرمپ نے پہلے ہی بڑے پیمانے پر پھانسیاں اور پرامن مظاہرین کی ہلاکت کو "ریڈ لائن" قرار دے دیا ہے۔
