ہندوستانی طلباء اور تاجروں کی بڑی تعداد ایران میں رہتی ہے۔ ہندوستان سے بھی مسلمان زائرین ایران جاتے ہیں۔ دریں اثناء ایران میں پرتشدد مظاہروں اور امریکہ کی جانب سے حملے کی دھمکی کے باعث طلباء کے اہل خانہ پریشان ہیں۔ ہندوستانی سفارتخانے نے ایک ایڈوائزری بھی جاری کی ہے جس میں انہیں ایران چھوڑنے پر زور دیا گیا ہے۔ اب ہندوستانی شہریوں نے ایران سے واپسی شروع کردی ہے۔ دہلی کے ہوائی اڈے پر، ان کے اہل خانہ ایران سے واپس آنے والے ہندوستانی طلباء اور دیگر شہریوں کے استقبال کے لیے جوش اور راحت کے ساتھ انتظار کر رہے ہیں۔
ایران میں گزشتہ چند دنوں سے انٹرنیٹ بند ہونے کی خبروں نے اہل خانہ کی پریشانی میں اضافہ کر دیا تھا لیکن اپنے پیاروں کی بحفاظت واپسی نے سب کے چہروں پر مسکراہٹیں بکھیر دیں۔ خاندان کے ایک فرد نے میڈیا سے گفتگو کی۔ انہوں نے بتایا کہ ان کی والدہ اور خالہ زیارت کے لیے ایران گئی ہوئی تھیں۔ ان کا کہنا تھا کہ گزشتہ ایک ہفتے سے انٹرنیٹ بند تھا، اس لیے وہ ان سے رابطہ نہیں کر پا رہے تھے۔ یہ ان کے لیے بہت پریشان کن وقت تھا۔ انہوں نے کہا کہ اب وہ بہت پرجوش ہیں اور ان کا انتظار کر رہے ہیں۔
خاندان کے ایک اور فرد نے بتایا کہ ان کی والدہ 7 جنوری کو زیارت کے لیے ایران پہنچی تھیں۔ پہلے دو دن وہ باقاعدگی سے بات چیت کرتے رہے لیکن 8 جنوری کے بعد انٹرنیٹ بند ہو گیا جس سے رابطہ مکمل طور پر منقطع ہو گیا۔ ان کا کہنا تھا کہ ان کی والدہ نے انہیں پہلے بتایا تھا کہ وہاں سب کچھ نارمل ہے۔ لیکن اس کے بعد ان سے رابطہ ٹوٹ گیا جس میں کافی فکر مند ہو گیا تھا،مگر اب ان کی واپسی کی خبر سے مجھے بڑی راحت ملی ہے۔
ایئرپورٹ پر پہنچنے والے ایک شخص نے میڈیا کو بتایا کہ ایران میں حالات میں یقینا کشیدگی ہے،لیکن فسادات وہاں کی عوام نہیں بلکہ کچھ شر پسند افراد انجام دے رہے ہیں،اور منصوبہ بند سازش کے تحت ایران کو بدنام اور تباہ کرنے کی سازش رچی جا رہی ہے،جس میں غیر ملکی طاقتیں ملوث ہیں۔انہوں نے مزید کہا کہ ایرانی حکومت صورتحال کو سنبھال رہی ہے اور وزیر اعظم مودی کی قیادت میں ہندوستانی حکومت بھرپور تعاون فراہم کر رہی ہے۔
واپس آنے والے ایک اور شہری نے کہا، ہم مکمل طور پر محفوظ تھے، کچھ بھی غلط نہیں ہوا، ہم اپنے طور پر واپس آئے۔ ایک اور مسافر نے مزید کہا، انٹرنیٹ کو کنٹرول کے مقاصد کے لیے بند کیا گیا تھا۔ یہ کوئی غیر معمولی صورتحال نہیں تھی۔ ایسی چیزیں ہر ملک میں ہوتی ہیں۔ سیاحوں کو کسی قسم کی پریشانی کا سامنا نہیں کرنا پڑا، اور سب کچھ معمول کے مطابق تھا۔
