مدھیہ پردیش کے رتلام علاقے سے ایک افسوسناک خبر سامنے آرہی ہے،یہاں بودھی انٹرنیشنل اسکول میں زیر تعلیم 13 سالہ قومی سطح کے اسکیٹنگ ایتھلیٹ نے اپنے اسکول کی تیسری منزل سے اس وقت چھلانگ لگا دی جب اس کے پرنسپل نے اس کا کیریئر ختم کرنے، اسے معطل کرنے اور اس کے تمغے چھیننے کی دھمکی دی ۔تاہم طالب علم ہسپتال میں زیر علاج ہے۔
چھلانگ لگانے کی نوبت کیوں آئی؟
رپورٹس کے مطابق 27 نومبر جمعرات کو طالب علم قواعد کی خلاف ورزی کرتے ہوئےموبائل فون کے ساتھ اسکول میں داخل ہوا،اور کلاس روم کے اندر ویڈیو ریکارڈ کر کے سوشل میڈیا پر اپ لوڈ کر دیا۔ جس پر پرنسپل نے انہیں ڈانٹ لگائی۔طالب علم نے اپنے والدین اور حکام کو بتایا کہ پرنسپل نے مبینہ طور پر اس کے کیریئر کو برباد کرنے، اسے اسکول سے معطل کرنے اور اس کے اسکیٹنگ کے تمغے چھیننے کی دھمکیاں دیں۔ اس سے وہ ڈر گیا اور وہ رونے لگا۔ سی سی ٹی وی فوٹیج کے مطابق طالب علم کو پرنسپل کے دفتر سے نکلنے کے بعد راہداری سے نیچے بھاگتے ہوئے اور پھر تیسری منزل سے ریلنگ پر چھلانگ لگاتے ہوئے دیکھا جا سکتا ہے۔
واقعے کے بعد زخمی طالب علم کو ابتدائی طور پر رتلام کے ایک پرائیویٹ اسپتال میں داخل کرایا گیا جہاں اسے ابتدائی طبی امداد دی گئی۔ تاہم جب ان کی حالت بہتر نہیں ہوئی تو انہیں گجرات کے احمد آباد کے ایک اسپتال میں ریفر کر دیا گیا۔ طالب علم اس وقت وہاں زیر علاج ہے، اور ڈاکٹر ان کی حالت پر مسلسل نظر رکھے ہوئے ہیں۔
اہل خانہ نے کاروائی کا مطالبہ کیا:
طالب علم کے والد پریتم کٹارا کا کہنا تھا کہ اسکول انتظامیہ نے مجھے ان سے ملنے کے لیے اسکول بلایا، جب میں پہنچا تو مجھے اسپتال آنے کو کہا گیا، پرنسپل کی دھمکیوں نے میرے بیٹے کو چھلانگ لگانے پر مجبور کیا، اسکول انتظامیہ کے خلاف کاروائی کی جائے۔اس دوران ڈسٹرکٹ ایجوکیشن آفیسر انیتا ساگر نے کہا، تفتیش مکمل ہونے کے بعد کاروائی کی جائے گی۔
تاہم پرنسپل ڈولی چوہان کے خلاف ایف آئی آر درج کر لی گئی ہے۔اس واقعہ نے اسکول انتظامیہ پر کئی سوالات کھڑے کردیئے ہیں۔ کیا ڈانٹ بہت زیادہ تھی؟ کیا بچہ ضرورت سے زیادہ ذہنی دباؤ کا شکار ہو گیا؟ ان سوالوں کے جواب تحقیقات کے بعد ہی سامنے آئیں گے۔
