منگل کو جموں و کشمیرکے ضلع کٹھوعہ کے باسوہلی میں سیوا پاور پراجیکٹ میں ایک ساتھی جوان کی مبینہ طور پر فائرنگ کے بعد سنٹرل انڈسٹریل سیکورٹی فورس (سی آئی ایس ایف) کے چار اہلکار بشمول ایک افسر ہلاک ہو گئے۔ابتدائی معلومات کے مطابق، مبینہ طور پر پاور پروجیکٹ پر سیکورٹی کے لیے تعینات سی آئی ایس ایف اہلکاروں کے درمیان جھگڑا ہوا۔ جھگڑے کے بعد ایک جوان نے مبینہ طور پر اپنے ساتھیوں پر گولی چلا دی۔یہ واقعہ کٹھوعہ ضلع کے پہاڑی علاقے میں واقع بسوہلی-سیوا 2 پروجیکٹ سائٹ سے بتایا گیا ہے۔
ایس ایس پی نے کی فائرنگ کی تصدیق
اہلکاروں نے بتایا کہ مبینہ طور پر فائرنگ کرنے والے جوان کو کٹھوعہ پولیس نے گرفتار کر لیا ہے۔کٹھوعہ کے سینئر سپرنٹنڈنٹ آف پولیس (ایس ایس پی) موہتا شرما نے فائرنگ کے واقعہ کی تصدیق کی۔ پولیس کے اعلیٰ افسران بھی موقع پر پہنچ گئے ہیں۔جھگڑے اور فائرنگ کا سبب بننے والے حالات کے بارے میں مزید تفصیلات کے ساتھ ساتھ ہلاک ہونے والوں کی شناخت کا انتظار ہے۔ حکام واقعے کے بارے میں معلومات اکٹھا کرنے کا سلسلہ جاری رکھے ہوئے ہیں۔
اے کے47سے اندھا دھند فائرنگ کی
ذرائع کے مطابق، یہ واقعہ بسوہلی کے مشکا گاؤں میں سیوا پاور پروجیکٹ میں تعینات سی آئی ایس ایف یونٹ میں تقریباً 6.40 بجے ایک بحث کے بعد پیش آیا۔ہلاک شدگان کی شناخت اسسٹنٹ کمانڈنٹ انکت کمار پانڈے، سب انسپکٹر لکشمن سنگھ، کانسٹیبل رفیق احمد اور کانسٹیبل سندیپ کمار کے طور پر کی گئی ہے۔مشتبہ شوٹر، جس کی شناخت ہیڈ کانسٹیبل اودیش کمار سنگھ کے طور پر ہوئی ہے، مبینہ طور پر دفتر کے احاطے میں داخل ہوا اور اپنی جاری کردہ AK-47 رائفل سے اندھا دھند فائرنگ کی۔ سی آئی ایس ایف کے مطابق، اس کے پاس گولہ بارود کے 150 راؤنڈ تھے۔
حکام کر رہےہیں جانچ
چار زخمی اہلکاروں کو ہماچل پردیش کے ایک این ایچ پی سی اسپتال لے جایا گیا، جہاں وہ بعد میں زخموں کی تاب نہ لاتے ہوئے دم توڑ گئے۔پولیس نے موقع پر پہنچ کر علاقے کو گھیرے میں لے لیا۔ اودیش کمار سنگھ کو گرفتار کر کے پولیس کے حوالے کر دیا گیا ہے۔حکام شوٹنگ کے ارد گرد کے حالات کی تحقیقات کر رہے ہیں۔
