امریکہ، نیو یارک سٹی کے ضلع بروکلین میں بدھ کی دوپہر ایک تین منزلہ رہائشی عمارت کے منہدم ہونے کے بعد ہلاکتوں کی تعداد بڑھ کر 8 ہو گئی ہے۔ میئر ذوہرن مامدانی نے جمعرات کو ایک پیغام میں اس کی تصدیق کرتے ہوئے کہا کہ کم از کم 17 افراد زخمی ہیں جن میں 3 فائر فائٹرز بھی شامل ہیں، جب کہ ملبے سے کم از کم 4 زندہ افراد کو نکال لیا گیا ہے۔ ان کے مطابق امدادی کارکنوں نے گزشتہ رات بھر انتہائی خطرناک حالات میں تلاش اور نجات کا کام جاری رکھا ۔
واقعہ مقامی وقت کے مطابق بدھ کی شام تقریباً 4 بجے فلیٹ بش نامی علاقے میں پیش آیا، جہاں 1930 میں تعمیر ہونے والی 4 یونٹ پر مشتمل یہ عمارت ساتھ والی تعمیراتی جگہ پر بنے کھدائی کے گڑھے میں گر گئی۔ فائر ڈیپارٹمنٹ کے چیف جان ایسپوزیٹو نے بتایا کہ عمارت سیدھی اس حصے میں گری جہاں کھدائی جاری تھی اور وجہ کی تحقیقات ہو رہی ہیں۔ فائر کمشنر لیلین بونسنئیور نے ابتدائی طور پر کم از کم 19 متاثرین کی تصدیق کی تھی جن میں 7 بچے شامل تھے، تاہم یہ واضح نہیں کیا کہ ہلاک ہونے والوں میں بچے شامل ہیں یا بالغ۔ زخمیوں میں سے 4 کی حالت تشویش ناک بتائی جاتی ہے۔
حکام کے مطابق 250 سے زائد فائر فائٹرز اور پیرا میڈکس کو تعینات کیا گیا، جب کہ ڈرونز، سرچ ڈاگز اور پاور ساوز کی مدد سے ملبہ کاٹا جا رہا ہے۔ بونسنئیور نے صحافیوں کو بتایا کہ ابھی یہ معلوم نہیں کہ ملبے کے زون میں کتنے لوگ موجود ہیں اور یہ کاروائی طویل عرصہ لے سکتی ہے۔ ایسپوزیٹو کے بقول پورے مقام کی تلاش میں کئی دن لگ سکتے ہیں اور مجموعی طور پر لاپتا افراد کی صحیح تعداد بھی فی الحال نامعلوم ہے۔
مقامی میڈیا کے مطابق کم از کم 4 زندہ بچ جانے والوں میں ایک حاملہ خاتون بھی شامل ہے جنہیں عمارت گرنے کے تقریباً 2 سے 2.5 گھنٹے بعد نکالا گیا۔ بدھ ہی کو میئر مامدانی نے ابتدائی رسپانڈرز کی خدمات کو خراج تحسین پیش کرتے ہوئے کہا کہ یہ انتہائی مشکل اور تیزی سے بدلتی ہوئی صورتحال تھی، ملبے کے غیر مستحکم ڈھانچے اور سطح کے نیچے خطرناک خلا نے کام مزید کٹھن بنا دیا، لیکن یہی وہ ریسکیو ہے جس کے لیے ایف ڈی این وائی تربیت پاتا ہے۔ انہوں نے ایک پیغام میں ہلاک شدگان کے متاثرہ افراد سے تعزیت اور زخمیوں کی جلد صحت یابی کی دعا بھی کی۔
دوسری جانب بلڈنگز کمشنر احمد تیگانی نے بتایا کہ متصل پلاٹ پر 3 منزلہ عمارت کے لیے تعمیراتی منصوبے منظور ہو چکے تھے اور 9 منزلہ عمارت کی اجازت کے لیے بھی درخواست دی گئی تھی۔ رہائشی اینڈرسن ویلِیز نے نیو یارک پوسٹ کو بتایا کہ ان کی اہلیہ اور 2 بچے، جن کی عمریں 7 اور 2 سال ہیں، حادثے کے وقت پھنس گئے تھے۔ ان کے مطابق اہلیہ نے عمارت گرتے ہی فون کیا، وہ چیخ رہی تھیں کہ ہمارے بیٹے کو نکالو، پھر کال کٹ گئی، بعد ازاں معلوم ہوا کہ انہیں زندہ نکال لیا گیا۔
