غزہ کی پٹی میں شدید بارشوں اور خراب موسم کے باعث آنے والے سیلاب نے پہلے سے تباہ حال شہری زندگی کو مزید مشکل بنا دیا ہے۔ اسرائیلی جنگ کے دوران تباہ ہونے والے نکاسی آب اور سیوریج کے نظام کی کمزوری کے باعث بڑے پیمانے پر علاقے زیرِ آب آ گئے، جبکہ ہزاروں بے گھر فلسطینیوں کے خیمے پانی میں ڈوب گئے۔ مقامی حکام کے مطابق اکتوبر 2023 سے جاری اسرائیلی حملوں نے شہری بنیادی ڈھانچے کو اس قدر نقصان پہنچایا ہے کہ اب معمول کی بارش بھی لوگوں کے لیے بڑی مصیبت بن گئی ہے۔
غزہ کے مغربی علاقے میں دکان چلانے والے فلسطینی شہری رمضان رباح نے بتایا کہ سیلابی پانی ان کی دکان میں داخل ہو گیا، جس سے بڑی مقدار میں سامان تباہ ہو گیا۔ ان کے ساتھ آس پاس کے دکانداروں کو بھی بھاری مالی نقصان اٹھانا پڑا۔ رمضان رباح کے مطابق اگر بلدیاتی اداروں کے پاس پانی نکالنے والی گاڑیاں، پمپ اور بلڈوزر جیسے ضروری وسائل موجود ہوتے تو نقصان کو کافی حد تک کم کیا جا سکتا تھا اور کئی گھروں، دکانوں اور خیموں کو ڈوبنے سے بچایا جا سکتا تھا۔
غزہ کے گورنمنٹ میڈیا آفس کے مطابق شدید بارشوں کے باعث تقریباً 70 ہزار خیمے ڈوب گئے یا انہیں نقصان پہنچا، جس سے لگ بھگ ساڑھے تین لاکھ افراد متاثر ہوئے ہیں۔ بعض عارضی کیمپوں میں پانی کی سطح ڈیڑھ میٹر تک پہنچ گئی۔ صرف 12 گھنٹوں کے دوران شہری دفاع کے ادارے کو امداد کے لیے 2 ہزار سے زیادہ کالز موصول ہوئیں، لیکن ایندھن کی کمی اور ضروری مشینری خراب ہونے کے باعث صرف 218 درخواستوں پر ہی کارروائی کی جا سکی۔
حکام کے اعداد و شمار کے مطابق غزہ میں سیوریج نظام کی 700 کلومیٹر سے زیادہ طویل پائپ لائنیں تباہ ہو چکی ہیں۔ جنگ اور محاصرے کے باعث غزہ سٹی میونسپلٹی کی کارکردگی بھی بری طرح متاثر ہوئی ہے۔ اس وقت میونسپلٹی کے پاس صرف ایک بلڈوزر ہے، جو اکثر خراب ہو جاتا ہے، جبکہ پانی نکالنے والی صرف دو گاڑیاں دستیاب ہیں۔ پانی اور سیوریج کے بیشتر پمپ بھی کام نہیں کر رہے ہیں۔
غزہ سٹی میونسپلٹی کے ترجمان حسنی مہنّا نے الجزیرہ کو بتایا کہ اسرائیلی حملوں کے دوران 135 سے زیادہ گاڑیاں اور بھاری مشینری تباہ ہو چکی ہیں۔ اس کے نتیجے میں میونسپلٹی کی مجموعی مشینری کا تقریباً 85 فیصد حصہ ختم ہو گیا، جبکہ صرف 15 فیصد باقی رہ گیا ہے۔ ان کے مطابق موجودہ مشینری بھی پرانی اور خستہ حال ہے، جو بار بار خراب ہوتی رہتی ہے۔ بنیادی خدمات جاری رکھنے کے لیے مسلسل مرمت کی ضرورت پڑتی ہے، اسی لیے میونسپلٹی نجی شعبے کے دستیاب وسائل سے بھی مدد لینے پر مجبور ہے۔
حسنی مہنّا کے مطابق غزہ شہر کے آٹھ میں سے چھ سیوریج پمپ تباہ ہو چکے ہیں اور اب تک دو سے زیادہ پمپ دوبارہ فعال نہیں کیے جا سکے۔ اس وجہ سے نکاسی آب کی صلاحیت اپنی بہترین ممکنہ حالت میں بھی تقریباً 20 فیصد رہ گئی ہے۔ بارش کے پانی کی نکاسی کا نظام بھی شدید نقصان کا شکار ہے۔ جنگ سے پہلے شہر میں موجود 4 ہزار 800 ڈرینز میں سے تقریباً 2 ہزار 800 تباہ ہو چکی ہیں۔
ایسے حالات میں شدید بارش غزہ کے بے گھر اور متاثرہ خاندانوں کے لیے ایک نئی آزمائش بن گئی ہے۔ تباہ شدہ خیموں، ناکارہ نکاسی آب کے نظام، ایندھن کی قلت اور محدود امدادی وسائل نے لوگوں کی مشکلات میں مزید اضافہ کر دیا ہے۔ پہلے ہی جنگ کے باعث گھروں سے محروم فلسطینی اب بارش اور سیلاب سے بچنے کے لیے بھی بنیادی سہولیات سے محروم ہیں۔
