بھارتی خواتین کرکٹ ٹیم نے 2026 کے ایشین گیمز میں بھارت کے لیے پہلا گولڈ میڈل جیت لیا ہے۔ ہرمن پریت کور کی قیادت میں بھارتی ٹیم نے فائنل میں سری لنکا کو 147 رنز کے بڑے فرق سے شکست دے کر طلائی تمغہ اپنے نام کیا۔ ٹاس جیتنے کے بعد بھارت نے پہلے بیٹنگ کا فیصلہ کیا۔ بھارتی ٹیم نے شاندار بیٹنگ کا مظاہرہ کرتے ہوئے مقررہ اوورز میں 216 رنز کا بڑا اسکور کھڑا کیا۔ شفالی ورما، اسمرتی مندھانا اور رچا گھوش نے اہم اننگز کھیل کر ٹیم کو مضبوط پوزیشن میں پہنچایا۔ بھارت کی جانب سے اسمرتی مندھانا نے 79 رنز کی شاندار اننگز کھیلی، جبکہ شفالی ورما نے 48 رنز بنائے۔ رچا گھوش نے آخر میں تیز رفتار بیٹنگ کرتے ہوئے 49 رنز کی ناقابلِ شکست اننگز کھیلی اور بھارت کا اسکور 200 رنز کے پار پہنچانے میں اہم کردار ادا کیا۔
217 رنز کے ہدف کے تعاقب میں سری لنکا کی شروعات اچھی نہیں رہی۔ کپتان چماری اتھاپتھو اور امیشا دلانی نے اننگز کا آغاز کیا، لیکن دونوں پہلی وکٹ کے لیے صرف 18 رنز جوڑ سکیں۔شفالی ورما نے بیٹنگ کے بعد بولنگ میں بھی شاندار کارکردگی دکھائی۔ انہوں نے پاور پلے کے دوران دو اہم وکٹیں حاصل کیں۔ شفالی نے امیشا دلانی کو 3 رنز اور حسینی پریرا کو بغیر کوئی رن بنائے پویلین بھیج دیا۔
اس کے بعد دیپتی شرما نے سری لنکا کی کپتان چماری اتھاپتھو کی اہم وکٹ حاصل کی۔ اتھاپتھو نے 21 گیندوں پر 21 رنز بنائے، جس میں پانچ چوکے شامل تھے۔ اگلے ہی اوور میں شرینکا پاٹل نے ہرشیتا مادھوی کو صفر پر آؤٹ کر دیا۔ سری لنکا کی وکٹیں مسلسل گرتی رہیں اور پوری ٹیم صرف 69 رنز پر آل آؤٹ ہوگئی۔ بھارت کی جانب سے دیپتی شرما نے تین وکٹیں حاصل کیں، جبکہ شفالی ورما، شرینکا پاٹل اور سری چرانی نے دو، دو کھلاڑیوں کو آؤٹ کیا۔
بھارت کی جیت میں اسمرتی مندھانا کی اننگز خاص طور پر اہم رہی۔ شفالی ورما اور مندھانا نے پہلی وکٹ کے لیے 99 رنز کی شراکت قائم کی۔ شفالی اپنی نصف سنچری سے صرف دو رنز دور رہ گئیں۔ انہوں نے 29 گیندوں پر تین چھکوں اور تین چوکوں کی مدد سے 48 رنز بنائے۔اس کے بعد مندھانا نے اپنی نصف سنچری مکمل کی اور 79 رنز کی شاندار اننگز کھیلی۔ انہوں نے 45 گیندوں کا سامنا کرتے ہوئے سات چھکے اور پانچ چوکے لگائے۔ اسی اننگز کے دوران مندھانا نے بین الاقوامی کرکٹ میں 11 ہزار رنز بھی مکمل کیے۔
مندھانا کے آؤٹ ہونے کے بعد رچا گھوش نے تیز رفتار بیٹنگ کا سلسلہ جاری رکھا۔ بھارت کا اسکور 16.5 اوورز میں 163 رنز تھا، لیکن رچا نے آخری اوورز میں جارحانہ بیٹنگ کرتے ہوئے ٹیم کو 216 رنز تک پہنچا دیا۔رچا نے صرف 22 گیندوں پر 49 رنز کی ناقابلِ شکست اننگز کھیلی، جس میں تین چھکے اور چھ چوکے شامل تھے۔ آخری اوور میں بھارت نے 25 رنز بنائے۔ 147 رنز کی اس بڑی جیت کے ساتھ بھارتی خواتین کرکٹ ٹیم نے ایشین گیمز 2026 میں گولڈ میڈل حاصل کیا۔ یہ ایشین گیمز میں بھارتی خواتین کرکٹ ٹیم کا مسلسل دوسرا طلائی تمغہ ہے۔
