محمد سراج کی قیادت میں حیدرآباد کی ٹیم نے 2026-27 رانجی ٹرافی سیزن کا آغاز شاندار کامیابی کے ساتھ کیا ہے۔ حیدرآباد نے جم خانہ گراؤنڈ میں کھیلے گئے مقابلے میں تریپورہ کو ایک اننگز اور 40 رنز سے شکست دے دی۔ اس جیت میں اسپنر سنے تھیاگراجن ( Tanay Thyagarajan) نے اہم کردار ادا کیا، جنہوں نے میچ میں مجموعی طور پر 9 وکٹیں حاصل کیں۔ انیکیت ریڈی نے بھی پہلی اننگز میں 5 وکٹیں لے کر تریپورہ کی بیٹنگ لائن کو مشکلات میں ڈال دیا۔ میچ میں تریپورہ نے ٹاس جیت کر پہلے بیٹنگ کا فیصلہ کیا۔ ٹیم کے اوپنرز بکرم کمار داس نے 50 رنز اور ہرتوراج رائے نے 33 رنز بنائے۔
دونوں کے درمیان پہلی وکٹ کے لیے 80 رنز کی شراکت داری ہوئی، لیکن Tanay Thyagarajan نے رائے کو آؤٹ کرکے اس شراکت کو توڑ دیا۔ اس کے بعد تریپورہ کے بلے باز بڑی اننگز کھیلنے میں ناکام رہے۔ مندیپ سنگھ کے علاوہ کوئی بھی بلے باز ڈبل فیگر تک نہیں پہنچ سکا، جبکہ پانچ کھلاڑی اپنا کھاتہ بھی نہیں کھول پائے۔ پوری ٹیم پہلی اننگز میں 134 رنز پر آل آؤٹ ہوگئی۔ ٹنے تیاگراجن نے 3 وکٹیں حاصل کیں، جبکہ انیکیت ریڈی نے 5 بلے بازوں کو پویلین بھیجا۔ کپتان محمد سراج اس اننگز میں کوئی وکٹ حاصل نہیں کر سکے۔
جواب میں حیدرآباد کے اوپنرز تنمے اگروال اور ابھیراٹھ ریڈی نے ٹیم کو اچھی شروعات فراہم کی۔ تنمے نے 54 رنز بنائے، جبکہ ابھیراٹھ ریڈی نے 32 رنز کا تعاون دیا۔ مڈل آرڈر کے کچھ بلے باز بڑی اننگز کھیلنے میں ناکام رہے، لیکن نچلے آرڈر کے کھلاڑیوں نے ذمہ داری کے ساتھ بیٹنگ کرتے ہوئے ٹیم کا اسکور 294 رنز تک پہنچا دیا۔ ریتک یادو نے 61 رنز کی اہم اننگز کھیلی، جبکہ راہل رادیش اور چاما ملند نے 40، 40 رنز بنائے۔ اس طرح حیدرآباد نے پہلی اننگز میں 160 رنز کی اہم برتری حاصل کرلی۔
160 رنز کے خسارے کے ساتھ دوسری اننگز شروع کرنے والی تریپورہ کی ٹیم اس بار بھی حیدرآباد کے بولرز کا سامنا نہ کر سکی۔ پوری ٹیم صرف 120 رنز پر سمٹ گئی۔ دوسری اننگز میں تریپورہ کے چھ بلے باز ڈبل فیگر تک بھی نہیں پہنچ سکے۔ Tanay Thyagarajan نے دوسری اننگز میں 6 وکٹیں حاصل کیں۔ اس طرح انہوں نے میچ میں مجموعی طور پر 9 وکٹیں لے کر حیدرآباد کی جیت میں کلیدی کردار ادا کیا۔ حیدرآباد نے یہ مقابلہ ایک اننگز اور 40 رنز سے اپنے نام کرلیا اور رانجی ٹرافی کے نئے سیزن میں پہلی کامیابی حاصل کی۔
سنے تھیاگراجن ( Tanay Thyagarajan) 15 نومبر 1995 کو بنگلور میں پیدا ہوئے۔ وہ فرسٹ کلاس کرکٹ میں حیدرآباد کی جانب سے کھیلتے ہیں اور اپنی اسپن بولنگ کے لیے جانے جاتے ہیں۔ وہ آئی پی ایل میں پنجاب کنگز کے اسکواڈ کا حصہ بھی رہ چکے ہیں، تاہم انہیں ابھی تک آئی پی ایل میں ڈیبیو کرنے کا موقع نہیں ملا۔ ان کے فرسٹ کلاس ریکارڈ کے مطابق، انہوں نے 37 میچوں کی 65 اننگز میں 170 وکٹیں حاصل کی ہیں۔ لسٹ اے کرکٹ میں ان کے نام 33 میچوں میں 34 وکٹیں ہیں، جبکہ ٹی ٹوئنٹی فارمیٹ میں وہ 41 میچوں میں 36 وکٹیں حاصل کر چکے ہیں۔ تریپورہ کے خلاف ان کی شاندار بولنگ نے ایک بار پھر ٹیم کے لیے ان کی اہمیت کو نمایاں کیا۔
