Saturday, November 21, 2026 | 10 جمادى الآخرة 1448
  • News
  • »
  • عالمی منظر
  • »
  • بھارت میں ایس آئی آر کے دوران مذہبی اقلیتوں کو بنایا جا رہا ہے نشانہ: امریکی مذہبی آزادی کمیشن کا الزام

بھارت میں ایس آئی آر کے دوران مذہبی اقلیتوں کو بنایا جا رہا ہے نشانہ: امریکی مذہبی آزادی کمیشن کا الزام

Reported By: Munsif News Bureau | Edited By: editor | Last Updated: 20 Nov 2026

بھارت میں ایس آئی آر کے دوران مذہبی اقلیتوں کو بنایا جا رہا ہے نشانہ: امریکی مذہبی آزادی کمیشن کا الزام

امریکی کمیشن برائے بین الاقوامی مذہبی آزادی نے کہا ہے کہ ہندوستان میں ووٹر فہرستوں کی حالیہ نظرِثانی کے دوران مذہبی اقلیتیں، بالخصوص مسلمان شہری، غیر معمولی طور پر متاثر ہوئے ہیں۔

کمیشن کے چیئرمین آصف محمود نے جمعرات کو جاری ایک بیان میں الزام عائد کیا کہ ہندوستانی حکومت مسلمان شہریوں کو ووٹر فہرستوں سے خارج کر کے انہیں “غیر ملکی” قرار دے رہی ہے اور اب غیر قانونی طور پر ان کی بے دخلی بھی کی جا رہی ہے۔

کمیشن کے مطابق یہ کاروائی اس وسیع عمل کے دوران سامنے آئی ہے جس میں ملک بھر میں ووٹر فہرستوں سے تقریباً 130 ملین نام حذف کیے گئے، جو ہندوستان کی انتخابی تاریخ میں سب سے بڑی کمی بتائی جا رہی ہے۔ ابتدائی اعداد و شمار ظاہر کرتے ہیں کہ یہ محرومیاں مسلمانوں پر غیر متناسب طور پر اثر انداز ہوئیں، جو ہندوستان کی سب سے بڑی مذہبی اقلیت ہیں اور جن کے بارے میں حقوق کی تنظیمیں 2014 میں وزیر اعظم نریندر مودی کی ہندو قوم پرست بھارتیہ جنتا پارٹی کے برسرِ اقتدار آنے کے بعد بڑھتی ہوئی امتیازی پالیسیوں اور نفرت انگیزی کی نشاندہی کرتی رہی ہیں۔

ہندوستانی الیکشن کمیشن کا موقف ہے کہ نظرِثانی کے دوران دہری اندراجات، فوت شدہ، منتقل شدہ اور دوسری طور پر نااہل ووٹروں کے نام نکالے گئے اور اگر کسی کا نام غلطی سے خارج ہوا ہے تو وہ اپیل کا حق رکھتا ہے۔ تاہم کمیشن نے کہا کہ یہ عمل غیر ملکیوں کی نشاندہی اور انہیں ملک بدر کرنے کی ایک علیحدہ مہم کے ساتھ گڈ مڈ ہو گیا ہے، حالانکہ صرف ووٹر فہرست سے نام نکلنے سے کسی کی شہریت ختم نہیں ہو جاتی۔

امریکی کمیشن کی کمشنر جین ملز نے اسے ہندوستانی حکمتِ عملی میں تشویشناک اضافہ قرار دیتے ہوئے کہا کہ اپنے ہی شہریوں کو محض مذہبی شناخت کی بنیاد پر نکالنا انتہائی افسوسناک ہے، اور انہوں نے امریکی محکمۂ خارجہ سے ہندوستان کو “خصوصی تشویش کے حامل ملک” کے درجے میں رکھنے کی سفارش کی۔ یہ کمیشن ایک دو جماعتی امریکی سرکاری ادارہ ہے جو دنیا بھر میں مذہبی آزادی کی نگرانی کرتا اور پالیسی سفارشات دیتا ہے، تاہم واشنگٹن نے حالیہ برسوں میں ہندوستان سے متعلق اس کی سفارشات پر کوئی کاروائی نہیں کی۔


ایم ای نے الزامات کو کیا مسترد
ہندوستان کی وزارتِ خارجہ نے ان الزامات کو جانبدارانہ قرار دیتے ہوئے مسترد کر دیا۔ وزارتِ خارجہ کے ترجمان رندھیر جیسوال نے جمعہ کے روز معمول کی بریفنگ میں کہا کہ یہ ادارہ کھلے عام سیاسی ایجنڈا رکھتا ہے اور اس کی رائے کو سنجیدگی سے لینے کی ضرورت نہیں۔ دوسری جانب ووٹر فہرستوں کی نظرِثانی کے خلاف گزشتہ ہفتوں میں مختلف شہروں میں احتجاج دیکھنے میں آیا، جہاں اپوزیشن جماعتوں اور طلبہ نے کہا کہ یہ کٹوتیاں اُن ووٹروں کو زیادہ متاثر کرتی ہیں جو غالباً حکمراں بی جے پی کے مخالف ہیں۔ حقوق کے ماہرین نے ان احتجاجات پر کریک ڈاؤن کی بھی مذمت کی۔