حیدرآباد پولیس نے کارڈ اینڈ سرچ آپریشن کے دوران ویزا کی مدت ختم ہونے کے باوجود غیرقانونی قیام کرنے کےالزام میں 23 غیرملکی باشندوں کو گرفتار کیا۔لوگوں کے غیرقانونی قیام کے بارے میں مصدقہ انٹیلی جنس اطلاع پر کاروائی کرتے ہوئے گولکنڈہ زون کے ٹولی چوکی پولیس اسٹیشن حدود میں ایک بڑے پیمانے پرمحاصرہ اور تلاشی آپریشن (CASO) کیا گیا۔
سرچ آپریشن کہاں کیا گیا
ایک پولیس افسر نے منگل کو بتایا کہ پیر کی رات کو کی گئی کاروائی، پیرا ماؤنٹ کالونی (گیٹس 1 سے 4)، آئی اے ایس کالونی، اور حکیم پیٹ کنٹہ پر کی گئی ۔ اس کاروائی میں گولکنڈہ زون کے ڈپٹی کمشنر آف پولیس جی چندر موہن کی راست نگرانی میں 250 اہلکاروں نے حصہ لیا۔اسٹریٹجک عمل میں 10 سرچ پارٹیاں، سات کٹ آف پارٹیاں، پانچ لفٹنگ پارٹیاں اور دو ہولڈنگ پوائنٹس شامل تھے۔
23 غیرملکی باشندوں کی شناخت
بنیادی مقصد ان غیر ملکیوں کی شناخت کرنا تھا جو اپنے ویزے سے زیادہ قیام کر رہے تھے۔ فارنرز ریجنل رجسٹریشن آفس (FRRO) حیدرآباد کے تعاون سے عہدیداروں نے مختلف ممالک کے 23 غیر ملکیوں کی شناخت کی جو غیر قانونی طور پر مقیم ہیں۔
30 گاڑیاں،9گیس سلنڈر اور شراب کی بوتلیں ضبط
غیر قانونی رہائشیوں کو حراست میں لینے کے علاوہ، پولیس نے بغیر درست دستاویزات کے 30 دو پہیہ گاڑیاں، نو گیس سلنڈر (تین بڑے اور چھ چھوٹے) غیر قانونی گیس ری فلنگ کے لیے استعمال کیے اور 53 شراب کی بوتلیں (180 ملی لیٹر اور 90 ملی لیٹر) قبضے میں لے لیں جو غیر قانونی طور پر فروخت کی گئی تھیں۔
گولکنڈہ زون، ڈی سی پی کا بیان
ڈی سی پی نے کہا کہ گولکنڈہ زون پولیس عوام کی حفاظت کو یقینی بنانے اور اقامتی قوانین کو سختی سے نافذ کرنے کے لیے پابند عہد ہے۔ انہوں نے کہا کہ خلاف ورزی کرنے والوں کے خلاف مزید قانونی کاروائی شروع کی جا رہی ہے۔
پولیس گرفتارشدہ افراد کی قومیت ظاہرنہیں کی
پولیس نے ان افراد کی قومیت ظاہر نہیں کی ہے جو غلط ویزوں اور پاسپورٹوں کے ساتھ قیام پذیر پائے گئے تھے۔ متعدد غیر ملکی، جن میں زیادہ تر افریقی ممالک سے ہیں، پیراماؤنٹ کالونی اور ٹولی چوکی کے دیگر حصوں میں قیام پذیر ہیں۔شہر میں غیر قانونی طور پر مقیم غیر ملکیوں کی شناخت کے لیے ماضی میں متعدد مواقع پر اسی طرح کی کارروائیاں کی گئیں۔
غیرقانونی قیام پر ملک بدر بھی کیا گیا
حالیہ مہینوں میں، پولیس نے ایف آر آر او اور دیگر ایجنسیوں کے ساتھ مل کر ایسے غیر ملکیوں کو ملک بدر کیا جو اپنے ویزوں کی میعاد ختم ہونے کے بعد بھی قیام پذیر تھے۔ یہ کارروائی منشیات سے متعلق کئی معاملات میں کی گئی جن میں مبینہ طور پر غیر ملکی شامل تھے۔گزشتہ ماہ، حیدرآباد نارکوٹکس انفورسمنٹ ونگ (H-NEW) کے ذریعہ ایک نائجیرین شہری کو مبینہ طور پر ہندوستان میں غیر قانونی طور پر قیام کرنے اور منشیات فروشوں کے ساتھ تعلق کے الزام میں گرفتار کیا گیا تھا، اور قومی سلامتی کے لیے نقصان دہ سمجھی جانے والی سرگرمیوں کو روکنے کے لیے نائجیریا بھیج دیا گیا تھا۔
