ایس پی لیڈر اعظم خان اور ان کے بیٹے عبداللہ اعظم کو رام پور کی خصوصی ایم پی-ایم ایل اے کورٹ سے بڑا جھٹکا لگا ہے۔ عدالت نے اعظم خان اور ان کے بیٹے کو 2019 کے ڈبل پین کارڈ کیس میں مجرم قرار دیا ہے۔ عدالت نے آج 17 نومبر کو اپنا فیصلہ سناتے ہوئے ان دونوں کو دھوکہ دہی، جعلسازی اور مجرمانہ سازش کا مجرم قرار دیا اور انہیں سات سال قید کی سزا سنائی۔عدالت کے فیصلے کے بعد اعظم خان اور ان کے بیٹے عبداللہ اعظم کو کمرہ عدالت میں ہی حراست میں لے لیا گیا۔
کیا ہے پورا معاملہ؟
بی جے پی ایم ایل اے آکاش سکسینہ نے 6 دسمبر 2019 کو رام پور کے سول لائنز پولیس اسٹیشن میں اعظم خان اور ان کے بیٹے کے خلاف مقدمہ درج کرایا تھا،شکایت میں الزام لگایا گیا تھا کہ عبداللہ اعظم نے دو مختلف تاریخ پیدائش کا استعمال کرتے ہوئے دو پین کارڈ حاصل کیے ۔
شکایت کے مطابق، پین کارڈز جھوٹے اور جعلی دستاویزات کی بنیاد پر جاری کیے گئے تھے اور مبینہ طور پر بینکنگ، انکم ٹیکس ریکارڈ اور انتخابی مقاصد کے لیے استعمال کیے گئے تھے۔ مبینہ طور پر ایک پین کارڈ میں عبداللہ کی تاریخ پیدائش یکم جنوری 1993 تھی، جبکہ دوسرے میں 30 ستمبر 1990 درج تھی۔ پولیس نے بعد میں تفتیش مکمل کی اور عدالت میں چارج شیٹ داخل کی، جس کے نتیجے میں آج انہیں سزا سنائی گئی۔
اعظم خان اکتوبر 2023 میں جیل گئے تھے:
اعظم خان اکتوبر 2023 میں جیل گئے تھے۔ انہیں متعدد مقدمات کا سامنا ہے۔ یوں وہ جیل میں رہے جبکہ مختلف مقدمات میں فیصلے آتے رہے۔ ستمبر 2025 میں، انہیں تمام مقدمات میں ضمانت مل گئی اور 23 ستمبر کو جیل سے رہا کیا گیا۔ اب 55 دن بعد اسے دوبارہ سزا سنائی گئی ہے۔ اس بار ان کے ساتھ ان کے بیٹے عبداللہ کو بھی سزا سنائی گئی ہے۔
ایک وقت تھا جب اعظم خان کا شمار اتر پردیش میں سماج وادی پارٹی کے سب سے طاقتور لیڈروں میں ہوتا تھا۔ جب ملائم سنگھ یادو ریاست میں برسراقتدار تھے تو اعظم خان بہت طاقتور تھے اور ان کا زبردست اثر و رسوخ تھا۔ لیکن وقت بدلا، اور اتر پردیش میں بی جے پی کے اقتدار میں آنے کے ساتھ ہی اعظم خان کی قسمت بدل گئی، اور وہ متعدد مقدمات کی وجہ سے سلاخوں کے پیچھے چلے گئے۔
