سماج وادی پارٹی کے سینئر لیڈر اعظم خان کو بڑی راحت ملی ہے۔ اعظم خان، جو اپنے بیٹے عبداللہ اعظم خان کے ساتھ دو پین کارڈ کیس میں رام پور جیل میں ہیں، کو ایم پی-ایم ایل اے عدالت نے فوجی اہلکاروں کے خلاف ان کے ریمارکس کے معاملے میں بری کر دیا ہے۔ ایم پی-ایم ایل اے کی خصوصی عدالت، رام پور نے آج سنائے گئے اپنے فیصلے میں اعظم خان کو بری کر دیا ہے۔
2017 کی انتخابی مہم کے دوران اعظم خان پر فوج کے جوانوں کے بارے میں متنازعہ ریمارکس کرنے کا الزام تھا۔ اس بیان کی بنیاد پر بی جے پی لیڈر آکاش سکسینہ نے ان کے خلاف مقدمہ درج کرایا۔آٹھ سال کے مقدمے کی سماعت کے بعد، عدالت نے آج اپنا حتمی فیصلہ سناتے ہوئے اعظم خان کو الزامات سے بری کر دیا ہے۔ عدالت نے معاملہ کی سماعت کرتے ہوئے کہا کہ کیس میں خاطر خواہ ثبوت پیش نہیں کیے گئے۔اس بنیاد پر اعظم خان کو کسی بھی الزام میں قصوروار نہیں پایا گیا اور انہیں مکمل طور پر بری کر دیا گیا۔
عبداللہ اور اعظم خان جیل میں ہیں بند :
اعظم خان، اور انکے بیٹے عبداللہ اعظم فی الحال دو پین کارڈ رکھنے کے معاملہ میں مجرم ٹھہرائے جانے کے بعد جیل میں بند ہیں۔بی جے پی ایم ایل اے آکاش سکسینہ نے 6 دسمبر 2019 کو رام پور کے سول لائنز پولیس اسٹیشن میں اعظم خان اور ان کے بیٹے کے خلاف مقدمہ درج کرایا تھا،شکایت میں الزام لگایا گیا تھا کہ عبداللہ اعظم نے دو مختلف تاریخ پیدائش کا استعمال کرتے ہوئے دو پین کارڈ حاصل کیے ۔
شکایت کے مطابق، پین کارڈز جھوٹے اور جعلی دستاویزات کی بنیاد پر جاری کیے گئے تھے اور مبینہ طور پر بینکنگ، انکم ٹیکس ریکارڈ اور انتخابی مقاصد کے لیے استعمال کیے گئے تھے۔ مبینہ طور پر ایک پین کارڈ میں عبداللہ کی تاریخ پیدائش یکم جنوری 1993 تھی، جبکہ دوسرے میں 30 ستمبر 1990 درج تھی۔ پولیس نے بعد میں تفتیش مکمل کی اور عدالت میں چارج شیٹ داخل کی، جس کے نتیجے میں انہیں سزا سنائی گئی۔
خیال رہے کہ ایک وقت تھا جب اعظم خان کا شمار اتر پردیش میں سماج وادی پارٹی کے سب سے طاقتور لیڈروں میں ہوتا تھا۔ جب ملائم سنگھ یادو ریاست میں برسراقتدار تھے تو اعظم خان بہت طاقتور تھے اور ان کا زبردست اثر و رسوخ تھا۔ لیکن وقت بدلا، اور اتر پردیش میں بی جے پی اقتدار میں آئی۔اور اعظم خان کی قسمت بدل گئی۔
تاہم آج کے اس نئے فیصلے کے بعد ان کے حامیوں میں کچھ راحت کا احساس پایا جا رہا ہے۔ فیصلے کے پیش نظر عدالت کے احاطے میں سیکیورٹی کے سخت انتظامات کیے گئے تھے۔پولیس کو تعینات کیا گیا تھا، اور تمام فریقین کی سرگرمیوں پر نظر رکھی جا رہی تھی۔ اعظم خان کے حق میں فیصلہ آنے کے بعد ایس پی کارکنوں میں خوشی کا ماحول ہے۔
