بہار اسمبلی انتخابات کے لیے ووٹوں کی گنتی جاری ہے۔ پوسٹل بیلٹ کے بعد اب ای وی ایم کے ووٹوں کی گنتی ہو رہی ہے۔ ابتدائی رجحانات میں نیشنل ڈیموکریٹک الائنس (این ڈی اے) 138 سیٹوں پر برتری حاصل کر چکا ہے۔ جبکہ مہا گٹھ بندھن 73 سیٹوں پر آگے ہے اور دیگر جماعتیں یا آزاد امیدوار 4 سیٹوں پر سبقت لیے ہوئے ہیں۔ 243 رکنی بہار اسمبلی میں حکومت بنانے کے لیے اکثریت کا ہندسہ 122 ہے۔
کون سی پارٹی کتنی سیٹوں پر آگے؟
این ڈی اے میں شامل پارٹیوں کی بات کریں تو بی جے پی 69 اور جنتا دل یونائیٹڈ (جے ڈی یو) 60 سیٹوں پر آگے ہے۔ ادھر مہا گٹھ بندھن میں آر جے ڈی 58 اور کانگریس 11 سیٹوں پر برتری بنائے ہوئے ہے۔ پرشانت کشور کی جن سوراج پارٹی نے بھی 3 سیٹوں پر سبقت حاصل کر رکھی ہے۔ اس کے علاوہ دیگر جماعتیں یا آزاد امیدوار 8 سیٹوں پر آگے ہیں۔ سب سے پہلے پوسٹل بیلٹ کی گنتی ہوئی، ای وی ایم صبح 8:30 بجے کھولی گئیں۔
دونوں گٹھ بندھنوں نے کیے جیت کے دعوے:
دونوں گٹھ بندھنوں نے اپنی اپنی جیت کے دعوے کیے ہیں۔ آر جے ڈی نے کہا ہے کہ تیجسوی یادو 18 نومبر کو وزیراعلیٰ کے عہدے کا حلف لیں گے۔ آر جے ڈی لیڈر منوجھا نے کہا، "بہار تبدیلی کی طرف بڑھ رہا ہے۔ دوپہر کے بعد تمام بات واضح ہو جائے گی۔" ادھر بہار کے وزیر اشوک چودھری نے کہا، "نتیش کمار وزیراعلیٰ بننے جا رہے ہیں۔ جن لوگوں نے نتیش کمار کو کنارے لگانے کی کوشش کی تھی، اب انہیں سمجھ آ گیا ہے کہ نتیش کمار کیا ہیں.
پچھلے انتخابات کے نتائج کیا رہے تھے؟
2020 میں بہار میں تین مرحلوں میں اسمبلی انتخابات ہوئے تھے۔ نتائج میں این ڈی اے کو 125، مہا گٹھ بندھن کو 110 اور دیگر کو 8 سیٹیں ملی تھیں۔ این ڈی اے میں بی جے پی نے 74، جے ڈی یو نے 43 جبکہ وی آئی پی اور ہیم نے 4-4 سیٹیں جیتی تھیں۔ مہا گٹھ بندھن میں آر جے ڈی نے 75، کانگریس نے 19، سی پی آئی (ایم ایل) نے 12 اور سی پی آئی و سی پی آئی (ایم) نے 2-2 سیٹیں جیتی تھیں۔ این ڈی اے کی طرف سے نتیش کمار وزیراعلیٰ بنے تھے۔
ایگزٹ پولز میں این ڈی اے کو اکثریت :
بہار انتخابات سے متعلق تقریباً تمام ایگزٹ پولز میں این ڈی اے کی جیت کے امکانات ظاہر کیے گئے ہیں۔ جبکہ اپوزیشن مہا گٹھ بندھن کو اکثریت سے کم سیٹیں ملنے کا اندازہ لگایا گیا ہے۔ میٹرکس نے این ڈی اے کو 147-167 اور مہا گٹھ بندھن کو 70-90 سیٹیں ملنے کی پیش گوئی کی ہے۔ جے وی سی نے این ڈی اے کو 135-150، مہا گٹھ بندھن کو 88-103 اور دیگر کو 3-7 سیٹیں ملنے کا امکان ظاہر کیا ہے۔ تمام ایگزٹ پولز نے پرشانت کشور کی جن سوراج پارٹی کو 0-5 سیٹیں ملنے کی بات کہی ہے۔
