اتوار کی رات افغانستان میں زلزلے کے شدید جھٹکے محسوس کیے گئے۔ ریکٹر اسکیل پر اس زلزلے کی شدت 6 ریکارڈ کی گئی۔ اس زلزلے نے افغانستان میں تباہی مچا دی ہے۔ افغانستان میں آنے والے اس زلزلے میں اب تک ایک ہزار سے زائد افراد جان کی بازی ہار گئے جبکہ تین ہزار سے زائد افراد زخمی ہیں۔ یہاں راحت اور بچاو سرگرمیاں جار ی ہیں۔ عہدیداروں نے اموات میں مزید اضافہ کا خدشہ ظاہر کیاہے کیونکہ کئی لوگ ابھی لاپتہ ہیں جو ملبے کے نیچے دبے ہوسکتے ہیں۔
اس دوران افغانستان کرکٹ بورڈ نے اپنے ملک کے لوگوں کیلئے مدد کا ہاتھ بڑھایا ہے۔ ملک میں لوگوں کو اس تباہی سے بچانے کیلئے افغانستان کی ٹیم نے اپنی پوری میچ فیس عطیہ دینے کا اعلان کیا ہے۔افغانستان کی کرکٹ ٹیم ایشیا کپ سے قبل متحدہ عرب امارات اور پاکستان کے ساتھ یو اے ای میں ہی سہ فریقی ٹی ٹوئنٹی سیریز کھیل رہی ہے۔ اس سیریز کا تیسرا میچ یکم ستمبر کو کھیلا گیا۔ اس میچ سے قبل افغان ٹیم کے سوشل میڈیا ہینڈل پر ایک پوسٹ شیئر کی گئی تھی۔ اس پوسٹ میں بتایا گیا کہ افغانستان کی ٹیم یو اے ای کے خلاف میچ کیلئے اپنی پوری تنخواہ زلزلے سے متاثرہ خاندانوں کی مدد کیلئے عطیہ کرے گی۔افغانستان کرکٹ بورڈ نے یہ بھی اعلان کیا ہے کہ مشرقی افغان شہر خوست میں منعقد ہونے والے ریجنل لسٹ اے ٹورنامنٹ میں کھیلنے والے کھلاڑی بھی 2 ستمبر کو مالی عطیات دیں گے۔
اکتوبر 2023 میں بھی ایک تباہ کن زلزلہ آیا تھا:
7 اکتوبر 2023 کو افغانستان میں 6.3 شدت کا زلزلہ آیا۔ اس کے بعد زلزلے کے شدید جھٹکے بھی محسوس کیے گئے۔ طالبان حکومت کا اندازہ ہے کہ اس زلزلے میں کم از کم 4000 افراد ہلاک ہوئے تھے۔ تاہم، اقوام متحدہ نے مرنے والوں کی تعداد تقریباً 1,500 سے بہت کم بتائی ہے۔ حالیہ دنوں میں افغانستان میں آنے والی یہ بدترین قدرتی آفت تھی۔
