c25db313-7243-4a8c-8cf9-45f00da3bb46174202611349.jpg)
انفورسمنٹ ڈائریکٹوریٹ نے جمعہ کے روز پنجاب کے وزیر صنعت سنجیو اروڑہ اور ان سے منسلک متعدد مقامات پر چھاپے مارے۔ یہ کارروائی مبینہ مالی بے ضابطگیوں کی تحقیقات کے سلسلے میں کی گئی۔
چھاپوں کے فوراً بعد سنجیو اروڑہ کی جانب سے سوشل میڈیا پلیٹ فارم ایکس پر ایک بیان جاری کیا گیا، جس میں انہوں نے کہا:
"گڈ مارننگ! انفورسمنٹ ڈائریکٹوریٹ کی طرف سے میرے احاطے میں ایک کارروائی شروع کی گئی ہے۔ ایک ذمہ دار شہری کی حیثیت سے، میں ایجنسیوں کے ساتھ مکمل تعاون کروں گا، اور مجھے یقین ہے کہ سچ کی فتح ہوگی۔"
حکام کے مطابق، ای ڈی کی ٹیمیں لدھیانہ سمیت دیگر مقامات پر بھی چھاپہ مار کارروائیاں کر رہی ہیں۔ قابل ذکر بات یہ ہے کہ اس سے قبل بھی 2024 میں عام آدمی پارٹی کے رہنما اروڑہ کے ٹھکانوں پر اسی نوعیت کی کارروائی کی جا چکی ہے۔ تحقیقات کے دوران الزام لگایا گیا ہے کہ اروڑہ سے منسلک کمپنیوں نے کچھ دیگر اداروں کے ساتھ مل کر صنعتی اراضی کا رہائشی منصوبوں کے لیے غلط استعمال کیا، جس سے ریاستی حکومت کو نقصان پہنچا اور مبینہ طور پر بڑی مقدار میں غیر قانونی دولت جمع کی گئی۔
ادھر، حالیہ دنوں میں ای ڈی نے فارن ایکسچینج مینجمنٹ ایکٹ کے تحت بھی کارروائیاں تیز کر دی ہیں۔ چند روز قبل ہی ایجنسی نے عام آدمی پارٹی کے ایک اور رہنما اور راجیہ سبھا کے رکن اشوک کمار متل کے پنجاب اور ہریانہ میں واقع احاطوں اور تعلیمی اداروں پر بھی چھاپے مارے تھے۔ ای ڈی کی ان مسلسل کارروائیوں نے پنجاب کی سیاسی فضا کو ایک بار پھر گرم کر دیا ہے، جبکہ اپوزیشن اور حکومتی حلقوں میں اس معاملے پر بحث تیز ہو گئی ہے۔
