فیفا ورلڈ کپ 2026 جون11سے شروع ہونے جارہا ہے۔ اس ٹورنامنٹ کی میزبانی مشترکہ طو رپر امریکہ، کینیڈا اورمیکسیکو کریں گے۔ عالمی کپ میں حصہ لینے والے ممالک کی تعداد اور میچوں کی تعداد دونوں کے لحاظ سے یہ اب تک کا سب سے بڑا ورلڈ کپ بھی ہوگا۔ یہ ایک مکمل طور پر نئے دور کا آغاز کرے گا کیونکہ یہ ٹورنامنٹ تاریخ میں پہلی بار 32 ٹیموں سے بڑھ کر48 ٹیموں تک پہنچ گیا ہے۔ عالمی ایونٹ کافائنل جولائی19 کو کھیلا جائے گا۔
فیفا ورلڈ کپ کا نیا فارمیٹ کیا ہے؟
فٹ بال کے شائقین کے لیے، نیا فارمیٹ شروع میں الجھا ہوا دکھائی دے سکتا ہے، لیکن فیفا کا خیال ہے کہ تبدیلیاں مقابلے کو مزید جامع اور عالمی بنائیں گی۔
ناک آؤٹ مرحلہ؟
سابقہ نظام کے تحت عالمی کپ کی 32 ٹیموں کو چار ٹیموں کے آٹھ گروپوں میں تقسیم کیا جاتا تھا۔اور ہر گروپ سے سرفہرست دو ٹیمیں ناک آؤٹ مرحلے شروع ہونے سے پہلے راؤنڈ آف 16 میں پہنچ جاتی تھیں۔ لیکن اب فیفا 2026 کے لیے، 48 شریک ممالک کی ٹیموں کو اب چار ٹیموں کے 12 گروپوں میں تقسیم کیا گیا ہے۔ ہر ٹیم گروپ مرحلے کے تین میچ کھیلتی رہے گی۔
راؤنڈ آف 32 کیسے ہوگا؟
ہر گروپ سے سرفہرست دو ٹیمیں، آٹھ بہترین تیسرے نمبر پر آنے والی ٹیموں کے ساتھ، ناک آؤٹ راؤنڈ کے لیے کوالیفائی کریں گی۔ اس کا مطلب ہے کہ پرانے فارمیٹ کے تحت 16 کے بجائے 32 ٹیمیں ناک آؤٹ مرحلے میں داخل ہوں گی۔نتیجے کے طور پر، ٹورنامنٹ اب راؤنڈ آف 16، کوارٹر فائنل، سیمی فائنل اور فائنل میں جانے سے پہلے ایک اضافی ناک آؤٹ راؤنڈ پیش کرے گا، جسے راؤنڈ آف 32 کہا جاتا ہے۔رواں سال میچوں کی جملہ تعداد 64 سے بڑھ کر 104 ہو گئی ہے، جبکہ مقابلے تقریباً چھ ہفتے تک چلے گے۔
عراق 40سال بعد ٹورنامنٹ میں واپس!
سلاٹس میں اضافے سے بہت سی ٹیموں کو فائدہ ہوا ہے جو ایک طویل وقفے کے بعد ملٹی نیشنل ٹورنامنٹ میں واپسی کررہی ہیں۔ عراق 40 سال بعد ٹورنامنٹ میں واپسی کررہا ہے۔ اسکاٹ لینڈ 28 سال بعد پہلا ورلڈ کپ کھیلے گا۔
میچ کہاں کھیلے جائیں گے؟
تینوں ممالک میں 16 اسٹیڈیم ہیں، جن کے پاس میزبانی کے حقوق ہیں، جن میں 11 امریکہ، تین میکسیکو اور دو کینیڈا میں ہیں۔ فائنل سمیت زیادہ تر میچوں کی میزبانی امریکہ کرے گا، جبکہ کینیڈا اور میکسیکو بھی ٹورنامنٹ کے دوران گیمز کا انعقاد کریں گے۔ میکسیکو 1970 اور 1986 میں پہلے ایڈیشنز منعقد کرنے کے بعد تین الگ الگ ورلڈ کپوں میں میچوں کی میزبانی کرنے والا پہلا ملک بن جائے گا۔
فیفا ورلڈ کپ کیسے تیار کیا گیا؟
میڈیا رپورٹس کے مطابق 37 سینٹی میٹر بلند اور تقریباً 6 کلو گرام وزنی یہ ٹرافی 18 قیراط سونے سے تیار کی گئی ہے۔ ٹرافی کے نچلے حصے میں ملاکائٹ نامی سبز معدنی پتھر کی 2 تہیں بھی شامل ہیں۔
ٹرافی کی مالیت 250,000 امریکی ڈالرز!
رپورٹس کے مطابق موجودہ عالمی سونے کی قیمت کے حساب سے ٹرافی میں استعمال ہونے والے مواد کی مالیت تقریباً 250,000 امریکی ڈالرز بنتی ہے تاہم اس کی تاریخی اہمیت، نایاب حیثیت اور منفرد کاریگری کے باعث اگر اسے نیلام کیا جائے تو اس کی قیمت 20 ملین امریکی ڈالرز سے بھی تجاوز کر سکتی ہے۔
فیفا ٹرافی کا ڈیزئن کب تیارکیا گیا ؟
ٹرافی کا ڈیزائن 2 انسانی مجسموں پر مشتمل ہے جو زمین کو اپنے ہاتھوں میں تھامے ہوئے ہیں، اسے اطالوی مجسمہ ساز سلویو گازانیگا نے 1970ء میں ڈیزائن کیا تھا۔ دلچسپ بات یہ ہے کہ ورلڈ کپ جیتنے والی ٹیم کو اصل ٹرافی نہیں دی جاتی۔ فٹبال کی عالمی تنظیم فیفا اصل ٹرافی اپنی تحویل میں رکھتی ہے جبکہ فاتح ٹیم کو سونے کی ملمع کاری والی کانسی کی نقل بطور یادگار دی جاتی ہے۔
