مدھیہ پردیش کےضلع دموہ کے ہاٹا تھانہ علاقے میں مبینہ گؤ رکھشکوں کی غنڈہ گردی سا منے آئی۔ زرعی استعمال کے لیے بیلوں کو لے جانے والے دو کسانوں پر خود ساختہ گؤ رکھشکوں نے حملہ کر دیا۔ حملہ آوروں کا کہنا ہے کہ کسان مویشیوں کی اسمگلنگ کر رہے تھے۔ انھوں نے پیر کی رات دیر گئے کسانوں کو روکا اور انہیں جانوروں سمیت زبردستی مقامی پولیس اسٹیشن لے گئے۔ اس معاملے کا ایک ویڈیو سوشل میڈیا پر سامنے آیا ہے۔
متاثرین کی شناخت کمہاری تھانہ علاقہ کے تحت کالاکوٹ گاؤں کے پورن اور بھرت یادو کے طور پر ہوئی ہے۔ یہ کسان چھتر پور ضلع کے بکسوہا سے خریدے گئے چار بیلوں کو لے جا رہے تھے۔ کسانوں کی جانب سے جانوروں کے خریداری کی جائزرسیدیں پیش کرنے کے باوجود، کسانوں کو پولیس کے حوالے کرنے سے پہلے گؤ رکھشکوں کے گروہ نے مبینہ طور پر قانون کو ا پنے ہاتھ میں لیکرمار پیٹ کی۔
ہاٹا پولیس اسٹیشن کے انچارج اور تفتیشی افسر دھرمیندر اپادھیائے نے اس بات کی تصدیق کی کہ بیلوں کو قانونی طور پرحاصل کیا گیا تھا اور انہیں کاشتکاری کے مقاصد کے لیے منتقل کیا جا رہا تھا۔ افسر نے کہا"کچھ مقامی 'گاؤ رکھشکوں' نے حراست میں لیا اور ان سے پوچھ تاچھ کی۔ تصدیق کے بعد تمام فریقین کو جانے کی اجازت دی گئی،" ۔
تاہم، جب بھرت یادو کے چہرے پر نظر آنے والی چوٹ کے بارے میں پوچھا گیا، جیسا کہ مبینہ ویڈیو میں دیکھا گیا ہے، دھرمیندر اپادھیائے نے دعویٰ کیا کہ جب کسان پولیس اسٹیشن پہنچے تو کوئی شکایت درج نہیں کرائی گئی اور نہ ہی کوئی زخم دیکھا گیا۔افسر کے مطابق یہ واقعہ رات 9:30 بجے کے قریب پیش آیا۔ پولیس افسردھرمیندر اپادھیائے نے کہا کہ پولیس نے مبینہ حملہ آوروں کے خلاف کوئی مقدمہ درج نہیں کیا ہے۔ کیونکہ کسانوں نے شکایت نہیں کی۔تاہم، دھرمیندر اپادھیائے نے یہ واضح نہیں کیا کہ 'گاؤ رکھشکوں' کو کن قانونی دفعات کے تحت کسانوں کو حراست میں لینے اور ان سے پوچھ گچھ کرنے کا اختیار ہے، اور نہ ہی انہوں نے یہ انکشاف کیا کہ یہ افراد کون تھے۔
اس واقعہ نے خاص طور پردیہی مدھیہ پردیش میں گائے کے تحفظ کی آڑ میں بڑھتے غنڈہ گردی کے رجحان پر تشویش پیدا کردی ہے۔ کسانوں کے مطابق، جیسا کہ ویڈیو میں دیکھا گیا ہے، ان کی درخواستوں اور دستاویزات کو 'گؤ رکھشکوں' نے نظر انداز کر دیا، جنہوں نے پولیس کے پاس لے جانے سے پہلے ان پر حملہ کیا۔مبینہ طور پر اس واقعے کے دوران بھرت یادو کے چہرے پر چوٹیں آئیں، لیکن 'گاؤ رکھشکوں' پر قانونی کارروائی نہیں ہوئی۔
ایسا ہی ایک معاملہ جون 2025 میں مدھیہ پردیش کے رائسن ضلع میں پیش آیا تھا، جہاں جنید قریشی نامی ایک ڈیری آپریٹر مویشیوں کی نقل و حمل کے دوران مبینہ گؤ رکھشکوں کے ایک گروپ کی طرف سے مبینہ طور پر مار پیٹ کے بعد ہلاک ہو کر دیا گیا تھا۔ اس کا ساتھی شدید زخمی ہو گیا تھا۔اہل خانہ کی جانب سے یہ ثبوت پیش کرنے کے باوجود کہ مویشی دودھ کے استعمال کے لیے تھے، حملہ آوروں نے مبینہ طور پر مردوں کو گھنٹوں مارا پیٹا۔ پولیس نے بعد میں تصدیق کی کہ جانوروں کو قانونی طور پر لے جایا جا رہا تھا لیکن جانوروں پر ظلم کے قوانین کے تحت متاثرین کے خلاف ایک الگ ایف آئی آر بھی درج کرائی گئی۔
