پارلیمنٹ کے بجٹ سیشن سے قبل منگل کو منعقدہ آل پارٹی اجلاس میں حکومت نے اپوزیشن کے اہم مطالبات کو مسترد کر دیا۔ اپوزیشن جماعتیں وی بی-جی رام جی ایکٹ اور اسپیشل انٹینسیو ریویژن (ایس آئی آر) جیسے حساس امور پر پارلیمنٹ میں تفصیلی بحث کا مطالبہ کر رہی تھیں، تاہم حکومت نے واضح کر دیا کہ ان موضوعات پر پہلے ہی دونوں ایوانوں میں بحث ہو چکی ہے۔
پارلیمانی امور کے وزیر کرن رجیجو نے اجلاس کے بعد میڈیا سے گفتگو میں کہا کہ وی بی-جی رام جی ایکٹ، جو ایم جی نریگا کی جگہ لایا گیا ہے، پارلیمنٹ سے منظور ہو چکا ہے اور اب اس پر دوبارہ بحث یا نظرثانی ممکن نہیں۔ انہوں نے کہا، ’’جب کوئی قانون ملک کے سامنے آ جاتا ہے تو ہمیں اس پر عمل کرنا ہوتا ہے، ہم وقت کو پیچھے نہیں لے جا سکتے۔‘‘
اپوزیشن کی جانب سے کانگریس کے جے رام رمیش اور سی پی آئی (ایم) کے جان برٹاس سمیت کئی رہنماؤں نے بجٹ سیشن کے لیے حکومتی ایجنڈا پہلے سے شیئر نہ کیے جانے پر بھی اعتراض کیا۔ اس پر رجیجو نے کہا کہ صدر جمہوریہ کے خطاب کے بعد روایتی طور پر حکومتی کاروبار کی فہرست جاری کی جاتی ہے، تاہم حکومت جلد ہی اسے شیئر کرے گی۔
ذرائع کے مطابق اپوزیشن جماعتوں نے ایس آئی آر، وی بی-جی رام جی قانون، امریکہ کی جانب سے بھارت پر عائد محصولات، خارجہ پالیسی، فضائی آلودگی، معیشت کی صورتحال، اور کم عمر بچوں کے لیے سوشل میڈیا پر پابندی جیسے موضوعات پر بحث کا مطالبہ کیا۔ تاہم حکومت کا کہنا تھا کہ یہ تمام امور صدر کے خطاب اور بجٹ مباحث کے دوران اٹھائے جا سکتے ہیں۔
ایس آئی آر کے حوالے سے رجیجو نے کہا کہ گزشتہ سیشن میں انتخابی اصلاحات پر طویل اور جامع بحث ہو چکی ہے، جس میں یہ معاملہ بھی شامل تھا۔ ان کے مطابق دوبارہ اسی موضوع پر بحث کا مطالبہ غیر ضروری ہے۔ انہوں نے تمام ارکان سے اپیل کی کہ ایوان کی کارروائی کو ہنگامہ آرائی کے بغیر چلنے دیا جائے۔
رجیجو نے کہا کہ پارلیمانی جمہوریت میں ارکان کا فرض ہے کہ وہ نہ صرف اپنی بات رکھیں بلکہ دوسروں کی بات بھی تحمل سے سنیں۔ انہوں نے اس بات پر زور دیا کہ حکومت کی اولین ترجیح ایوان کو خوش اسلوبی سے چلانا ہے تاکہ عوامی مسائل پر مؤثر بحث ممکن ہو سکے۔
واضح رہے کہ پارلیمنٹ کا بجٹ سیشن بدھ سے شروع ہو رہا ہے، جس میں حکومت مالی سال کے بجٹ کے ساتھ ساتھ اہم پالیسی امور پر بھی گفتگو کرے گی۔
