 (2)1765c493-cd7c-493e-bf55-19923222507a2932026133641.jpg)
انڈین پریمیئر لیگ 2026 کا شاندار آغاز ہفتہ کو رائل چیلنجرز بنگلورو اور سن رائزرز حیدرآباد کے درمیان کھیلے گئے میچ سے ہوا، جہاں سب کی نظریں ویراٹ کوہلی پر مرکوز تھیں۔ "کنگ کوہلی" نے ایک بار پھر اپنی کلاس دکھاتے ہوئے ناقابل شکست 69 رنز کی اننگز کھیل کر اپنی ٹیم کو شاندار فتح دلائی۔
202 رنز کے ہدف کے تعاقب میں کوہلی نے صرف 38 گیندوں پر 69 رنز بنائے، جس میں 5 چوکے اور 5 چھکے شامل تھے۔ اس شاندار اننگز کے دوران انہوں نے ایک تاریخی کارنامہ بھی انجام دیا اور آئی پی ایل کی تاریخ میں ہدف کا تعاقب کرتے ہوئے 4000 رنز مکمل کرنے والے پہلے بلے باز بن گئے۔
میچ کے آغاز میں آر سی بی کو دھچکا اس وقت لگا جب اوپنر فل سالٹ صرف 8 رنز بنا کر آؤٹ ہو گئے۔ تاہم اس کے بعد کوہلی نے پڈیکل کے ساتھ مل کر اننگز کو سنبھالا۔ دونوں کھلاڑیوں نے دوسری وکٹ کے لیے سنچری شراکت قائم کی اور ٹیم کو مضبوط پوزیشن میں پہنچا دیا۔ پڈیکل نے صرف 26 گیندوں پر 61 رنز کی جارحانہ اننگز کھیلی۔
اس سے قبل، ٹاس ہار کر پہلے بیٹنگ کرنے والی حیدرآباد نے مقررہ 20 اوورز میں 201 رنز بنائے۔ ٹیم کے کپتان ایشان کشن نے 38 گیندوں پر 80 رنز کی شاندار اننگز کھیلی، جبکہ نوجوان بلے باز انیکیت ورما نے 18 گیندوں پر 43 رنز بنا کر ٹیم کا مجموعہ مضبوط کیا۔
تاہم، چناسوامی اسٹیڈیم کی نسبتاً چھوٹی باؤنڈریز کے باعث یہ ہدف محفوظ ثابت نہ ہو سکا۔ آر سی بی نے جارحانہ بیٹنگ کا مظاہرہ کرتے ہوئے صرف 15.4 اوورز میں ہدف حاصل کر لیا۔ یہ فتح نہ صرف آر سی بی کے لیے ایک بہترین آغاز ہے بلکہ کوہلی کی فارم بھی ٹیم کے لیے مثبت اشارہ ہے، جو اس سیزن میں بڑے کارناموں کی بنیاد رکھ سکتی ہے۔
