محمد سراج کی شاندار باؤلنگ کے بعد جوس بٹلر کی دھماکہ خیز بلے بازی کی بدولت گجرات ٹائٹنز نے رائل چیلنجرز بنگلور کو 8 وکٹوں سے شکست دے دی۔ 170 رنز کے ہدف کا تعاقب کرتے ہوئے گجرات نے 17.5 اوور میں جیت حاصل کی۔ محمد سراج کو ان کی شاندار باؤلنگ پر پلیئر آف دی میچ منتخب کیا گیا، انہوں نے اس میچ میں ایک ریکارڈ بھی بنایا اور سابق کھلاڑی ظہیر خان کو پیچھے چھوڑ دیا۔
پہلے بلے بازی کرتے ہوئے آر سی بی کی شروعات اچھی نہیں رہی۔ ویراٹ کوہلی دوسرے اوور میں 7 رنز بنانے کے بعد آؤٹ ہوئے۔ انہیں ارشد خان نے آؤٹ کیا۔ محمد سراج نے دیودت پڈیکل (4) فل سالٹ (14) اور لیام لیونگسٹون (54) کا وکٹ حاصل کیا۔ سراج نے اپنے 4 اوور کے اسپیل میں صرف 19 رنز دے کر 3 وکٹیں حاصل کیں۔
محمد سراج نے آئی پی ایل میں چناسوامی اسٹیڈیم میں سب سے زیادہ وکٹیں لینے کے معاملے میں ظہیر خان کو پیچھے چھوڑ دیا ہے، وہ اس گراؤنڈ پر آئی پی ایل میں سب سے زیادہ وکٹیں لینے والے پہلے فاسٹ بولر بن گئے ہیں۔ تاہم ان کے آگے صرف ایک گیند باز ہے اور وہ ہے اسپنر یوزویندر چہل۔ چہل نے 42 میچوں میں 52 وکٹیں حاصل کی ہیں۔ سراج کے پاس اب 22 میچوں میں 29 وکٹیں ہیں، ظہیر خان نے 26 میچوں میں 28 وکٹیں حاصل کی تھیں۔
یہ پہلا موقع ہے جب سراج نے ایم چناسوامی اسٹیڈیم میں ایک میچ میں دو بلے بازوں کوبولڈ کیا ہے۔ انہوں نے بدھ کو کھیلے گئے میچ میں فل سالٹ اور دیودت پڈیکل کو بولڈ کیا تھا۔اس ہار کے بعد رائل چیلنجرز بنگلور پوائنٹس ٹیبل میں پہلی سے تیسری پوزیشن پر آگئی ہے۔ یہ آر سی بی کی 3 میچوں میں پہلی شکست ہے۔ جبکہ گجرات ٹائٹنز جیت کے باوجود چوتھی پوزیشن پر برقرار ہے۔ پنجاب کنگز پہلے اور دہلی کیپٹلس دوسرے نمبر پر پہنچ گئے ہیں۔
