جامعہ ہمدرد نے اپنے بانیِ مرحوم حکیم عبد الحمید صاحب کی 117ویں سالگرہ 16 ستمبر 2025 کو صبح 11:30بجے، ہمدرد کنونشن سینٹر، جامعہ ہمدرد، نئی دہلی میں روایتی جوش و خروش کے ساتھ منائی۔ اس موقع پر بانیِ جامعہ ہمدرد کے روشن ویژن کو خراجِ پیش کیا گیا، جن کی علمی و تعلیمی خدمات آج بھی نئی نسلوں کے لیے مشعلِ راہ ہیں۔
تقریب کے مہمانِ خصوصی ممتاز فلسفی، مدبر، سیاستدان اور سابق رکن راجیہ سبھا پدم وبھوشن ڈاکٹر کرن سنگھ تھے، جنہوں نے اس تقریب کو رونق بخشی۔ یہ تقریب جامعہ ہمدرد کے معزز چانسلر حماد احمد صاحب کی سرپرستی میں منعقد ہوئی۔تقریب کا آغاز تلاوتِ قرآنِ پاک سے ہوا، جس کے بعد جامعہ ہمدرد کا ترانہ پیش کیا گیا۔پروفیسر ریشما نسرین، ڈین اسٹوڈنٹ ویلفیئر، نے استقبالیہ کلمات ادا کیے اور بانیِ جامعہ ہمدرد کی خدمات پر روشنی ڈالتے ہوئے جامعہ کے مشن اور ویژن کے ساتھ تجدیدِ عہد کیا۔
حکیم عبد الحمید میموریل لیکچر 2025
تقریب کا سب سے نمایاں پہلو "حکیم عبد الحمید میموریل لیکچر 2025" تھا، جو مہمانِ خصوصی ڈاکٹر کرن سنگھ نے پیش کیا۔ انہوں نے اپنا خطاب "تعلیم کے چار ستون" کے موضوع پر دیا، جو کہ یونیسکو کے پیش کردہ چار بنیادی تعلیمی اصولوں پر مبنی تھا:
1۔ جاننے کے لیے سیکھنا (Learning to Know)
2۔ کرنے کے لیے سیکھنا (Learning to Do)
3۔ ساتھ جینے کے لیے سیکھنا (Learning to Live Together)
4۔ بننے کے لیے سیکھنا (Learning to Be)
ڈاکٹر کرن سنگھ نے اپنے خطاب میں حکیم عبد الحمید صاحب کے ساتھ اپنی یادیں بھی شیئر کیں اور ان اصولوں کو موجودہ نظامِ تعلیم میں شامل کرنے کی اہمیت پر زور دیا تاکہ تعلیم محض علم کی ترسیل نہ ہو بلکہ ایک ہمہ جہت انسانی ترقی کا ذریعہ بنے۔
پروفیسر (ڈاکٹر) ایم۔افشارعالم، وائس چانسلر جامعہ ہمدرد، نے اپنے خطاب میں بانیِ جامعہ ہمدرد کے نظریات کی عصری اہمیت پر روشنی ڈالی۔ انہوں نے چار ستونوں کو جامعہ کی تعلیمی پالیسی سے ہم آہنگ قرار دیتے ہوئے کہا کہ یہ اصول نہ صرف علمی بلکہ سماجی، عملی اور شخصی ارتقاء کے لیے بھی نہایت اہم ہیں۔
تقریب میں کئی معزز شخصیات شریک ہوئیں، جن میں کرنل طاہر مصطفیٰ، رجسٹرار، ساجد احمد، سی ای او اور سیکرٹری، ہمدرد نیشنل فاؤنڈیشن (HECA)، ایس ایس اختر، کنٹرولر آف ایگزامینیشنز؛ محترمہ ہنا پروین، ڈینز، شعبہ جات کے سربراہان، سینئر عہدیداران، اساتذہ کرام اور طلبہ کی بڑی تعداد شامل تھی۔
آخر میں، کرنل طاہر مصطفیٰ، رجسٹرار، نے مہمانوں، شرکاء، اساتذہ، عملہ اور طلبہ کا تہہ دل سے شکریہ ادا کیا جن کی شرکت سے یہ تقریب یادگار اور کامیاب بنی۔ تقریب کا اختتام قومی ترانے پر ہوا۔
