پارلیمنٹ میں تعطل منگل کو ٹوٹنے کا امکان ہے۔ لوک سبھا اسپیکر اوم برلا نے کہا کہ تمام جماعتیں پیپر لیک روک تھام کے بل پر بحث کے لیے تیار ہیں۔ تاہم پارلیمانی ذرائع کا کہنا ہے کہ انہوں نے تمام جماعتوں کو راضی کر لیا ہے۔ پارلیمانی ذرائع نے بتایا کہ تمام پارٹیوں نے منگل کو پیپر لیکیج کی روک تھام کے ترمیمی بل پر بحث کرنے پر اتفاق کیا ہے اور اسپیکر اوم برلا کے اقدامات کی وجہ سے فلور لیڈروں نے بحث پر اتفاق کیا ہے۔اورمنگل کو اس بل پر تقریباً 6 گھنٹے تک بحث کے امکانات ہیں۔
ہنگاموں کےدرمیان بل پیش
پیر کو بھی پارلیمنٹ میں ہنگامہ جاری رہا۔ دونوں ایوانوں راجیہ سبھا اور راجیہ سبھا کی کاروائی دن بھر کےلئےملتوی کر دی گئی ۔اپویشن کےہنگامے کے درمیان مرکز نے عوامی امتحانات (غیر منصفانہ طریقوں کی روک تھام) ایکٹ 2024 میں ترمیمی بل پیش کیا۔ مرکزی وزیر جتیندر سنگھ نے آج لوک سبھا میں اینٹی پیپر لیک بل یا پبلک ایگزامینیشن (غیر منصفانہ طریقوں کی روک تھام) ترمیمی بل 2026 پیش کیا گیا۔
اپوزیشن کا احتجاج،پی ایم سےمعافی مانگنی کی مانگ
لیکن جیسے ہی بل پیش کیا گیا، اپوزیشن نے ایوان میں نعرے بازی شروع کردی اور گزشتہ ہفتے سی جے پی کے احتجاج کے دوران پولیس کی کاروائی پر حکومت سے معافی مانگنے کا مطالبہ کیا۔کانگریس کی قیادت میں اپوزیشن نے NEET پیپر لیک تنازعہ پر احتجاج کرنے والے طلباء کے خلاف پولیس کی مبینہ کاروائی پر حکومت کے خلاف اپنا حملہ جاری رکھا۔ اپوزیشن پارٹیاں مظاہرین پر مبینہ حملہ کے ذمہ داروں کے خلاف کاروائی کا مطالبہ کرتی رہیں اور وزیر اعظم نریندر مودی سے معافی مانگیں۔
تعطل ختم کرنے اسپیکر کی کوشش
مانسون سیشن کے پہلے ہفتے میں بھی بار بار رکاوٹیں دیکھنے میں آئیں اور بڑی حد تک کام کاج ٹھپ ہو گیا ۔ کیونکہ اپوزیشن جماعتوں نے مبینہ NEET پیپر لیک پر کاکروچ جنتا پارٹی (CJP) کی زیر قیادت ایجی ٹیشن کی حمایت کی اور پارلیمنٹ کے اندر اور باہر احتجاج کیا۔ ایوان میں تعطل برقرار رہنے پر اوم برلا نے حکومت اور اپوزیشن سے رابطہ کیا۔ اور ان پر زور دیا کہ وہ بامعنی اور جامع بحث میں حصہ لیں۔ انہوں نے دونوں فریقوں کو بتایا کہ یہ مسئلہ لاکھوں طلباء اور نوجوان امیدواروں اور ملک بھر میں مقابلہ جاتی امتحانات کی شفافیت سے متعلق ہے۔بعد میں برلا نے تمام سیاسی جماعتوں کے فلور لیڈروں کے ساتھ بھی بات چیت کی جس کے بعد ایوان زیریں میں تعطل ختم ہوا۔
بل پر بحث کیلئے اتفاق
ذرائع نے بتایا۔"تمام سیاسی جماعتوں نے منگل کو اینٹی پیپر لیک بل پر بحث کرنے پر اتفاق کیا ہے۔ اوم برلا کی پہل اور مسلسل بات چیت کے بعد، سیاسی جماعتوں کے فلور لیڈروں نے عوامی امتحان (غیر منصفانہ ذرائع کی روک تھام) ترمیمی بل 2026 پر بحث شروع کرنے پر اتفاق کیا ہے،"
کاروائی دن بھر کیلئےملتوی
ہنگاموں کےدرمیان لوک سبھا کی کاروائی کو وقفہ وقفہ سے ملتوی کیا گیا ۔ بل پر آج شام 5 بجے بحث ہونی تھی۔ لیکن اپوزیشن نے ایوان میں طلبا پر لاٹھی چارج کی مذمت کرتے ہوئے نعرے لگائے۔ جس کی وجہ سے ہنگامہ آرائی کے درمیان ایوان کی کاروائی کل تک کے لیے ملتوی کردی گئی۔
اینٹی پیپر لیک بل
پبلک ایگزامینیشن (غیر منصفانہ ذرائع کی روک تھام) ترمیمی بل، 2026 پبلک ایگزامینیشن (غیر منصفانہ طریقوں کی روک تھام) ایکٹ، 2024 میں ترمیم کرے گا۔ اس میں پیپر لیک کے معاملات کے لیے ہر ریاست میں فاسٹ ٹریک عدالتیں قائم کرنے اور دو ماہ کے اندر تحقیقات مکمل کرنے کی تجویز ہے۔اس بل میں سخت سزا بھی شامل ہے، جس میں پیپر لیک میں ملوث افراد کو 10 سال تک قید اور 50 لاکھ روپے تک جرمانے کی سزا بھی شامل ہے۔ پیپر لیکس سے متعلق منظم جرائم پر 10 کروڑ روپے تک کا جرمانہ ہو سکتا ہے۔
سخت قوانین کی یقین دہانی
وزیر اعظم نریندر مودی کی طرف سے پیپر لیک کے معاملات میں کاروائی اور سخت قوانین کی یقین دہانی کے بعد گزشتہ ہفتے مرکزی کابینہ نے اسے منظوری دی تھی ۔ پی ایم مودی نے گزشتہ ہفتے سوشل میڈیا سائٹس پر ایک ویڈیو میں کہا تھا کہ وہ پیپر لیک ہونے کی وجہ سے لوگوں کو ہونے والے درد کو سمجھتے ہیں، لیکن انہوں نے یقین دلایا کہ ان کی حکومت ایسے معاملات میں کارروائی کرنے اور قصورواروں کو انصاف کے کٹہرے میں لانے کے لیے پرعزم ہے۔
انہوں نے اپنے ایک ویڈیو میں NEETپیپر لیک کے واقعہ کا حوالہ دیتے ہوئے کہا۔"ہماری سب سے اہم ذمہ داری اس بات کو یقینی بنانا تھی کہ طلباء کا ایک سال ضائع نہ ہو۔ فوری طور پر امتحان کا انعقاد ضروری تھا۔ تمام وسائل کا استعمال کرتے ہوئے، حکومت نے اس بات کو یقینی بنایا ہے کہ 22 لاکھ طلباء دوبارہ امتحان میں شرکت کر سکیں،"۔
