مرکزی وزارتِ اقلیتی امور نے حج 2026 کے انتظامات کے لیے ابتدائی تیاریاں شروع کر دی ہیں۔ اس سلسلے میں دہلی میں ایک اہم اجلاس منعقد ہوا، جس میں حج 2025 کے تجربات کا جائزہ لیا گیا اور آئندہ حج کے بہتر انتظامات کے لیے حکمت عملی پر گفتگو کی گئی۔
اجلاس میں بتایا گیا کہ حج 2026 کے لیے درخواستیں آئندہ ایک ہفتے کے اندر طلب کی جائیں گی۔ وزارت نے تمام ریاستی حج کمیٹیوں، حج کمیٹی آف انڈیا اور متعلقہ اداروں کو ہدایت دی ہے کہ وہ مقامی سطح پر عازمین کی تربیت، طبی معائنے اور سفری دستاویزات کی تیاری کا کام فوری طور پر شروع کریں۔
مرکزی وزیر برائے اقلیتی امورکرن رجیجو نے اجلاس کے بعد کہا کہ: "ہم چاہتے ہیں کہ حج 2026 کی تیاریاں بروقت اور مکمل طور پر پیشگی مکمل ہوں، تاکہ عازمین کو کسی قسم کی دشواری کا سامنا نہ کرنا پڑے۔ اس لیے تمام درخواست گزار اپنی دستاویزات مقررہ وقت پر مکمل کریں۔"
Minority Affairs Minister Kiren Rijiju attends Haj Review Meeting 2026 in New Delhi.@KirenRijiju says the government is starting to accept Haj applications for 2026 within a week. He urges all applicants to fill out the form and submit it within the given timeframe.… pic.twitter.com/xhxPiUsAW3
— All India Radio News (@airnewsalerts) July 4, 2025
اجلاس میں حج 2025 کے دوران ہونے والی اموات کا بھی ذکر کیا گیا۔ اس سال 64 عازمین کی موت واقع ہوئی، جب کہ گزشتہ برس یہ تعداد 200 سے زائد تھی۔ اموات کی بڑی وجوہات میں بیماری، ضعیف العمری اور شدید موسم شامل تھے۔ آئندہ سال کے لیےطبی جانچ کو مزید سخت اور مؤثر بنانے کا فیصلہ کیا گیا ہے۔
وزارت نے ریاستی حج کمیٹیوں کو ہدایت دی ہے کہ مقامی تربیتی مراکز میں عازمین کے لیے عملی مشقیں، حفاظتی ہدایات اور سعودی عرب کے قواعد و ضوابط پر مبنی ورکشاپس منعقد کی جائیں، تاکہ عازمین کو سفر اور مناسک حج کی مکمل آگاہی دی جا سکے۔
اجلاس میں یہ بھی طے کیا گیا کہ حج مشن کی تیاری، افسران کی تعیناتی اور سعودی حکام سے بروقت رابطہ یقینی بنایا جائے گا، تاکہ رہائش، ٹرانسپورٹ اور دیگر سہولیات کے معاہدے وقت پر مکمل ہوں۔وزارت نے درخواست دہندگان کو مشورہ دیا کہ وہ اپنی صحت سے متعلق تفصیلات ایمانداری سے فراہم کریں، تاکہ کسی ممکنہ طبی خطرے سے بچا جا سکے۔
